Qazaqstan Kaspıı túbimen ótetin talshyqty-optıkalyq jelini iske qosýǵa jaqyndady
ASTANA. KAZINFORM — Qazaqstanda strategııalyq ınfraqurylymdyq joba — Kaspıı teńiziniń túbimen transkaspıılik talshyqty-optıkalyq baılanys jelisin tóseý jumystary jalǵasyp jatyr. Jobany paıdalanýǵa berý 2026 jyldyń sońyna josparlanǵan.
Qazirgi kezeńde kabeldi tasymaldaý men tıeýdiń praktıkalyq teńiz fazasy júzege asyrylyp jatyr.
Qazaqstan Respýblıkasynyń Jasandy ıntellekt jáne tsıfrlyq damý mınıstrligi jobany iske asyrýǵa baılanysty normatıvtik, uıymdastyrýshylyq jáne kedendik máselelerdi jedel sheshýdi qamtamasyz etti. Atap aıtqanda, Kaspıı teńiziniń túbimen sý astyndaǵy talshyqty-optıkalyq baılanys jelisin salý úshin múliktiń bekitilgen tizbesi jabdyqty áketýge quqyqtyq negiz jasap, ákimshilik kidiristerdiń aldyn alýǵa múmkindik berdi.
Daıyndyq kezeńinde 2025 jyly kameralyq jáne teńiz ınjenerlik izdenister aıaqtalyp, ıakor turaqtary men áskerı oqý-jattyǵý aımaqtaryn aınalyp ótetin ońtaıly baǵyt anyqtaldy. Sonymen qatar Mańǵystaý oblystyq tabıǵı resýrstar jáne tabıǵat paıdalanýdy retteý basqarmasynan ekologııalyq ruqsat alyndy.
Qytaıda ROPA tıpti optıkalyq kúsheıtkishteri bar arnaıy brondalǵan kabel óndirilip, zaýyttyq synaqtan sátti ótti. Osydan keıin joba teńiz jumystarynyń belsendi kezeńine kóshti.
Buǵan deıin Qytaıdan Quryq portyna jetkizilgen optıkalyq kabel men jalpy salmaǵy 600 tonnany quraıtyn úsh úlken tasymaldaý sebeti arnaıy logıstıkalyq kemege tıelip, Bakýge jetkizilgen.
— Qazirgi ýaqytta bul tasymaldaý sebetteri tolyq bosatylyp, barlyq tsıfrlyq arterııa tikeleı kemedegi arnaıy cable tank-ke tıeldi. Osylaısha, keme Baký portynan shyǵyp, Aqtaý porty baǵytynda jeli qurylysyn bastady, — delingen habarlamada.
Jobany júzege asyrý úshin dınamıkalyq oryn aýystyrýdyń ozyq júıesimen jabdyqtalǵan, sý syıymdylyǵy 20 myń tonnadan asatyn kabel tóseýshi keme tartyldy. Bortta tehnıkalyq qadaǵalaý mamandary men «Qazahtelekom» ókilin qosa alǵanda, 70 ekıpaj múshesi jumys istep jatyr.
Joba «Qazahtelekom» AQ jáne «Azertelecom Int.» JShS qurǵan CaspiLink B.V. (burynǵy Caspinet B.V.) birlesken kásiporny arqyly júzege asyrylýda.
Keme palýbasynda tótenshe jaǵdaılar nemese úzilister bolǵan jaǵdaıda paıdalanylatyn arnaıy túıistirý bólmesi (Jointing Room) ornatylǵan. Qazirgi ýaqytta onda kabeldiń eki ushy — qazaqstandyq jáne ázerbaıjandyq bólikteri ornalasqan. Barlyq talshyq pen optıkalyq júıe synaqtan ótken.
Qolaıly aýa raıy jaǵdaıynda sý asty kabelin tikeleı tóseý jumystaryn aıaqtaý 15-20 kún ishinde kútiledi. Al barlyq tehnologııalyq jumys men iske qosý-jóndeý keshenin aıaqtaý merzimi 2026 jyldyń sońyna belgilengen.
Eske salaıyq, buǵan deıin Qazaqstanda 1 123 aýyl talshyqty ınternetpen qamtylatynyn jazǵanbyz.
