Qazaqstan Kaspıı teńizi deńgeıiniń tómendeýine qarsy ortaq baǵdarlama ázirleýdi usyndy
ASTANA. KAZINFORM - Qazaqstan Respýblıkasynyń Iran Islam Respýblıkasyndaǵy Elshisi Ontalap Onalbaev Kaspıı teńizi kúnine jáne Kaspıı teńiziniń teńiz ortasyn qorǵaý jónindegi Tegeran negizdemelik konventsııasynyń kúshine engenine 20 jyl tolýyna arnalǵan konferentsııaǵa qatysty.
QR Syrtqy ister mınıstrli baspasóz qyzmetiniń habarlaýynsha, is-sharaǵa Irannyń Vıtse-prezıdenti – Qorshaǵan ortany qorǵaý uıymynyń basshysy Shına Ansarı, Iran Parlamentiniń, memlekettik organdardyń, dıplomatııalyq korpýs pen BUU Damý baǵdarlamasynyń ókilderi, sondaı-aq ǵylymı jáne sarapshylyq qaýymdastyq ókilderi qatysty.
Konferentsııa barysynda Tegeran konventsııasynyń mańyzdylyǵy, sondaı-aq Kaspıı teńiziniń biregeı ekojúıesin saqtaý maqsatynda Kaspıı mańyndaǵy bes memlekettiń ózara is-qımyly men ózara senimin odan ári nyǵaıtýdyń qajettigi atalyp ótti.
Kaspıı teńizi deńgeıiniń odan ári tómendeýi jáne onyń ekologııalyq ári áleýmettik-ekonomıkalyq saldaryna jeke nazar aýdaryldy. Osyǵan baılanysty Qazaqstan Respýblıkasynyń Prezıdenti Qasym-Jomart Toqaevtyń Kaspıı teńiziniń odan ári degradatsııasyna jol bermeý jónindegi Memleketaralyq baǵdarlamany ázirleý týraly bastamasyna nazar aýdaryldy.
Qazaqstan gıdrologııalyq jáne ekologııalyq derekter almasýdy jandandyrýǵa, birlesken monıtorıngti keńeıtýge, teńiz deńgeıiniń ózgerý sebepteri men saldaryn tereńirek zerdeleýge jáne kelisilgen beıimdelý sharalaryn ázirleýge shaqyrdy.
Iran tarapy Kaspıı mańy memleketteriniń yntymaqtastyǵyn nyǵaıtýǵa múddeli ekenin rastap, Tegeranda Tegeran konventsııasy Taraptarynyń jetinshi konferentsııasyn (COP7) ótkizý josparlary týraly habarlady.
Іs-shara sońynda qatysýshylar Kaspıı teńizin beıbitshilik, tatý kórshilik, ornyqty damý jáne ózara tıimdi yntymaqtastyq keńistigi retinde saqtaý maqsatynda Kaspıı mańyndaǵy bes memlekettiń kúsh-jigerin odan ári toptastyrý qajettigin atap ótti.
Osyǵan deıin Kaspıı mańy elderi Kaspıı ekojúıesin saqtaý úshin kúsh biriktirgeni týraly jazdyq.
