Qazaqstan Kaspıı teńizindegi flotyn kúsheıtedi

NUR-SULTAN. QazAqparat - Kaspıı teńizinde qazaqstandyq flottyń qatysýy 42 paıyzǵa deıin jetkiziledi. Bul týraly QR Indýstrııa jáne ınfraqurylymdyq damý mınıstrligi Avtomobıl joldary komıtetiniń tóraǵasy Saıranbek Barmaqov aıtty, dep habarlaıdy QazAqparat tilshisi.

«Nurly jol» memlekettik baǵdarlamasy aıasynda 2 parom jáne 4 qurǵaq júk tasyǵysh satyp alý kózdelip otyr. Bul júk tasymaly kólemin odan ári ulǵaıtýǵa, sondaı-aq Kaspıı teńizinde qazaqstandyq flottyń qatysýyn 42 paıyzǵa deıin arttyrýǵa múmkindik beredi. Sondaı-aq, apattylyqty 10,3 paıyzǵa deıin tómendetý jáne shlıýzderdiń ótkizý qabiletin jylyna 4000 kemege deıin jetkizý maqsatynda keme qatynasy shlıýzderine kúrdeli jóndeý júrgizý josparlanýda», - dedi komıtet tóraǵasy Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, bıyl atalǵan maqsattarǵa temirbeton qurylymdaryna jáne kótergish jabdyqtarǵa jóndeý júrgizý úshin 1,9 mlrd teńge bólindi.

«Osy jyldyń 6 aıynda 1,2 mlrd teńge nemese jyldyq qarjylandyrý kóleminiń 65 paıyzy ıgerildi», - dedi Saıranbek Barmaqov.