Qazaqstan Kaspıı teńizinde munaı tankerlerine talapty kúsheıtti
ASTANA. QazAqparat - Qazaqstan Kaspıı teńizinde ekologııalyq jaǵdaıdy qorǵaýda zańnamaǵa qatań talaptar engizip jatyr. Bul týraly búgin QR Parlamenti Senatynda Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynan keıin QR Investıtsııalar jáne damý mınıstrligi Kólik komıtetiniń tóraǵasy Áset Asaýbaev málim etti, dep habarlaıdy QazAqparat.
«Depýtattar tarapynan ázirlengen zań jobasyn talqyladyq, ıaǵnı kólik máseleleri boıynsha túzetýler engizilip jatyr. Atap aıtqanda, sý kóligi boıynsha Ekologııalyq kodekske tıisti normalar engizilýde. Mysaly, Kaspııde kemeler munaı aralasqan sýdy tókpeýin, qoqystardy shashpaýyn, plastıkalyq zattardy teńizge tastamaýyn qatań qadaǵalaıtyn normalar eskerildi. Sonymen qatar, teńiz arqyly munaı tasymaldaıtyn tankerlerdiń túbinde qos qabatty qalyńdatylǵan bólikteriniń bolýy sekildi qosymsha talaptar qoıylyp otyr»,-dedi komıtet tóraǵasy.
Onyń sózine qaraǵanda, zań jobasynda saralanǵan tarıfter boıynsha is-qımyldar qarastyrylǵan.
«Búginde Almaty men Astanada avtobýstarda elektrondy kólik júıeleri qurylǵany belgili. Osy oraıda júıede saralanǵan tarıfterdi paıdalaný baǵytynda tıisti zańnamalyq normalar engizildi»,-dedi ol.
Budan bólek, kóliktegi qaýipsizdikti qamtamasyz etý úshin qadaǵalaý sharalary quzyrly organdarǵa berilip jatyr.
«Tramvaılardyń jumysyn uıymdastyrý jergilikti ákimdikterge tıesili. Biraq kólikti paıdalanǵan kezde qaýipsizdik talaptarynyń saqtalýyn tekserý kóliktik baqylaý ınspektsııalarynyń quzyretine beriletin bolady. Búginde temir jolda osyndaı baqylaý júrgiziledi jáne mundaı sharalardy atqarýǵa qajetti qural-jabdyqtar bar. Osyndaı quzyretpen qosymsha tórt qaladaǵy tramvaılardyń qaýipsizdigin qamtamasyz etý úshin baqylaý kóliktik ınspektsııaǵa beriledi»,- dedi Á. Asaýbaev.
