Qazaqstan Kaspıı boıy jáne TMD elderi úshin derekterdi saqtaıtyn senimdi oryn bola alady - Á. Shójeeva
ASTANA. Naýryzdyń 5-i. Qazaqparat /Ernur Aqanbaı/ - Qýatty tranzıttik áleýetiniń, geografııalyq jaǵynan qolaıly ornalasýynyń jáne turaqty saıası jaǵdaıynyń arqasynda Qazaqstan Kaspıı boıy jáne TMD elderi úshin derekterdi saqtaıtyn senimdi oryn bola alady.
Bul týraly búgin Aqordada Elbasy Nursultan Nazarbaevtyń Qazaqstannyń áıelder qaýymynyń ókilderimen kezdesýinde «Zerde» Ulttyq aqparattyq kommýnıkatsııalyq holdıngi» AQ Basqarma tóraǵasynyń orynbasary Ázıza Shójeeva aıtty, dep habarlaıdy QazAqparat.
Onyń aıtýynsha, álemde derekterdi saqtaý qyzmetine degen suranys joǵary. Aqparattyń aýqymdy bóligi saqtalatyn iri serverler men data-ortalyqtar qazirgi ýaqytta negizinen AQSh-ta ornalasqan. Al, bir ǵana Reseıdiń ózinde derekterdi saqtaýǵa degen suranys jyl saıyn 30 paıyzǵa ulǵaıyp otyr.
Osy oraıda, Á. Shójeeva Qazaqstannyń úsh óńirinde, atap aıtqanda Atyraýda, Pavlodarda jáne Almaty mańyndaǵy «Alataý» arnaıy ekonomıkalyq aımaǵynda úsh qýatty data-ortalyqtar qurý qajettigin atap kórsetti. Bular Kaspıı boıyndaǵy memleketter men TMD elderiniń aqparattaryn saqtaý úshin qajet.
«Eger biz úsh kommýnıkatsııalyq operatorlar túıisetin jáne energetıkasy bar Atyraýda qýatty data-ortalyqtar quratyn bolsaq, oǵan atalmysh óńirde jumys isteıtin jáne Kaspıı boıy memleketterindegi munaı kompanııalary ózderiniń derekterin ornalastyra alar edi», dedi ol.
Onyń aıtýynsha, Pavlodar ıntellektýaldyq áleýeti joǵary Novosibirge jáne iri korporatsııalar ornalasqan Sibirge qashyq emes. «Bularda aqparatty saqtaý qajettiligi 40 paıyzǵa ǵana qanaǵattandyrylǵan. Bizde Pavlodarda arzan energetıka jáne tıisti klımattyq jaǵdaı bar», dedi ol. Derekterdi saqtaıtyn mundaı ortalyqtardy Almaty mańyndaǵy «Alataý» aranaıy ekonomıkalyq aımaǵynda qurýǵa bolady. «Sonymen qatar, aqparattardyń qupııalylyǵyna kepildik beretin arnaıy zańdar qabyldaý qajet. Osylaısha Qazaqstan óńirlik naryqtarǵa shyǵyp, kóptegen pozıtsııalar boıynsha básekelese alar edi», dedi Á. Shójeeva.
