Qazaqstan kásiptik-tehnıkalyq bilim berýdiń halyqaralyq standarttaryna kóshýde
ASTANA. 6 qańtar. QazAqparat - Bilim berýdi damytýdyń memlekettik baǵdarlamasy aıasynda tıimdiligi joǵary ınnovatsııalyq úlgige kóshý maqsatymen el ekonomıkasyn kásiptik-tehnıkalyq kadrlarmen qamtamasyz etýge
baǵyttalǵan arnaıy tehnıkalyq jáne kásiptik bilim berý baǵdarlamasy júzege asyrylýda, dep habarlady pm.kz saıty.
Qazirgi tańda Qazaqstanda Indýstrııalandyrý baǵdarlamasyndaǵy kadr suranysyn esepke ala otyryp, kásiptik-tehnıkalyq bilim berýdi jańǵyrtý boıynsha aýqymdy jumystar qolǵa alynýda.
Elbasynyń tapsyrmasyna sáıkes Qazaqstannyń Astana, Almaty, Aqtóbe, Shymkent qalalarynda kásiptik-tehnıkalyq bilim berýdiń halyqaralyq standarttary engiziletin álemdik deńgeıdegi 4 kolledjdiń qurylysy josparlanyp otyr.
«Bıznes-qoǵamdastyqpen jáne Sıngapýr, Germanııa, Nıderlandy elderiniń jetekshi oqý oryndarymen seriktestikte álemdik sanattaǵy kolledjder jelisin damytý úshin «Kásipqor» Holdıngi» AQ quryldy», - dep málimdegen bolatyn Premer-Mınıstr Kárim Másimov «Nur Otan» HDP keńeıtilgen otyrysynda jasaǵan baıandamasynda.
«Kásipqor» uzaq merzimdi strategııasy oqý oryndaryn bilim alýdyń qos júıeli baǵdarlamasyna aýystyrýǵa negizdelgen. Bastapqy kezeńde «Kásipqor» holdınginiń kollejderinde bilim berý úrdisi kelesideı keste boıynsha qurylatyn bolady: oqýdyń 80 paıyzy bilim berý ornynda, 20 paıyzy óndiriste ótedi. Oqý oryndarynda óndiristik tsıklge elikteý qalyptastyrylyp, stýdentterdi óndiristik tájirıbeden ótkizý úshin kásiporyndarmen kelisimsharttar jasalady. Іlki rejimde 1-2 mamandyq boıynsha qos júıede bilim berý baǵdarlamalary ázirlenedi.
«Kásipqordyń» jańa kolledjderinde 7 mektep, atap aıtqanda, ınjınırıng mektebi, sáýlet jáne qurylys mektebi, aqparattyq jáne kommýnıkatsııalyq tehnologııalar mektebi, dızaın jáne jobalaý mektebi, agroónerkásiptik keshen mektebi, metallýrgııa jáne mashına jasaý mektebi, pánaralyq mektep (kásiptik mektep) jumys isteıtin bolady. Árbir kolledjde ınnovatsııa jáne damý ortalyǵy ashylady. Sonymen qatar, tehnıkalyq jáne kásiptik bilim berý salasynda ustazdar daıarlaý úshin Astanada muǵalimderdiń biliktiligin arttyrý Ortalyǵy jumys isteıtin bolady.
Kásiptik-tehnıkalyq bilim berýdi damytý úshin qazirgi tańda tórt óńiraralyq ortalyqtyń qurylysy júrip jatyr. Atap aıtsaq, Atyraý qalasynda munaıgaz salasy úshin kadrlardy daıarlaý men qaıta daıarlaý jónindegi óńiraralyq ortalyqtyń qurylysy aıaqtalýǵa jaqyn. Ekibastuzdaǵy otyn-energetıkalyq sala úshin tehnıkalyq qamtamasyz etý eńbegi úshin jáne Óskemen qalasynda mashına jasaý salasy úshin kadrlardy daıarlaý men qaıta daıarlaý jónindegi óńiraralyq ortalyqtyń qurylysy jalǵasýda. Aǵymdaǵy jyldyń qarasha aıynda Shymkent qalasynda óńdeýshi ónerkásip salasy úshin óńiraralyq ortalyqtyń qurylysy bastaldy.
Qazaqstan TMD elderiniń arasynda birinshi bolyp burynǵy bastapqy jáne orta kásiptik bilimniń bazasynda tehnıkalyq jáne kásiptik bilim júıesin qurdy jáne bul bastama kadrlardy daıyndaýǵa tehnıkalyq baǵyt berýge, birneshe biliktilik deńgeıin belgileýge múmkindik berdi. Óz kezeginde ulttyq ekonomıka salalary úshin bilikti mamandar daıarlaý jańa ındýstrııalyq jobalardy júzege asyrýmen qatar Qazaqstan Úkimetiniń basty mindetteriniń birine aınaldy.
