Qazaqstan kásiporyndarynda apattar kúrt kóbeıdi - mınıstrlik
ASTANA. QazAqparat - 2018 jyldyń alǵashqy úsh aıynda Qazaqstan kásiporyndarynda apattar sany kúrt kóbeıdi. Olardyń basym bóligi kómir jáne munaı-gaz salalarynda bolǵan, dep habarlaıdy QazAqparat tilshisi.
Bul týraly QR Investıtsııalar jáne damý mınıstrligi Indýstrııalyq damý jáne ónerkásiptik qaýipsizdik komıteti tóraǵasynyń orynbasary Nyǵmetjan Maqajanov eńbek jáne ónerkásip qaýipsizdigine arnalǵan "KIOSH-2018" halyqaralyq konferentsııasynda málim etti.
«Sońǵy 5 jylda apattar sany 42%-ke azaıǵan, apattan zardap shekkender sany - 61%, qaza tapqandar sany - 57%-ke azaıǵan. Alaıda 2018 jyldyń alǵashqy úsh aıynda apattar sany kúrt kóbeıdi. Ótken jyldyń alǵashqy úsh aıynda 2 apat tirkelse, bıylǵy kezeńde - 10 apat oryn alǵan. Olardyń basym bóligi kómir jáne munaı-gaz salalarynda bolǵan. Bul dabyl qaǵarlyq óte joǵary kórsetkish», - dedi Nyǵmetjan Maqajanov.
Onyń aıtýynsha, apattardyń negizgi sebebi qural-jabdyqtardyń, ǵımarattar men qurylystardyń eskirýi bolyp otyr.
«Tekserilgen 98 myń qaýipti qurylǵylardyń 40%-ti, ıaǵnı 38 myńy normatıvtik jumys isteý merzimnen asyp ketken. Ekinshiden, eldegi óndiristi uıymdastyrý deńgeıi óte tómen - zańnama talaptaryn saqtamaý, jobalyq sheshimderdi júzege asyrmaý, berilgen nusqamalardy oryndamaý jáne basqalary», - dep túsindirdi komıtet ókili.
N. Maqajanov keltirgen derekterge sáıkes, elimizde 8 myńnan astam qaýipti óndiristik nysandar jumys isteıdi. Negizinen olar - jerasty ken oshaqtary men kómir shahtalary, karerler men razrezder, munaı men gaz ken oryndary, metallýrgııalyq, hımııalyq jáne munaı óńdeý zaýyttary, atomdyq ónerkásip nysandary, toraptyq qubyr jelileri. 8 myń kásiporynnyń jartysyna jýyǵy qaýiptiligi joǵary nysan bolyp sanalady.
2018 jyldyń alǵashqy toqsanynda Indýstrııalyq damý jáne ónerkásiptik qaýipsizdik komıteti 376 qaýipti óndiristik nysandy teksergen. Tekserý nátıjesinde 8 myńnan astam buzýshylyqtar anyqtalǵan. 33 nysan men 1 kásiporynnyń jumysy toqtatylyp, 27 mıllıon teńgege 269 aıyppul salynǵan.
Aıta keteıik, Dúnıejúzilik eńbekti qorǵaý kúni qarsańynda, Astana eńbek jáne ónerkásip qaýipsizdigine arnalǵan dástúrli "KIOSH-2018" halyqaralyq konferentsııasy ótip jatyr. Onda Qazaqstan, Qytaı, Reseı, Túrkııanyń 40-qa jýyq kompanııalary jeke qorǵaný quraldaryn, ónerkásiptik qaýipsizdik salasyndaǵy jańa qural-jabdyqtaryn tanystyrady.
