Qazaqstan kásipodaqtary Prezıdenttik saılaýda N.Nazarbaevtyń kandıdatýrasyn qoldaıdy

Bul týraly búgin elordada ótken baspasóz máslıhatynda QR Kásipodaqtar federatsııasynyń tóraǵasy Sııazbek Muqashev aıtty.

«Memleketimizdiń qýattylyǵyn kórsetetin, halqymyzdyń birligine taǵy bir márte syn bolatyn úlken saıası oqıǵanyń aldynda turmyz. Ol elimizde Prezıdent saılaýyn ótkizý», - dedi ol.

Onyń aıtýynsha, «Nur Otan» partııasynyń sezinde atap ótilgendeı, Memleket basshysy alǵa qoıǵan mindettemelerdiń basym kópshiligin merziminen buryn oryndaýǵa qol jetkizdi. Onyń ishinde áleýmettik máseleler, jalaqy, jumyssyzdyqpen kúres sııaqty kásipodaqtarǵa tán kóptegen sharýalar da jolǵa qoıylyp, oryndaldy. «Sondyqtan da kásipodaq músheleri Elbasynyń múmkinshiligi, halyq aldynda bedeli zor jáne áli de memleketti basqarsa degen pikirde», - dedi federatsııa tóraǵasy.

S.Muqashevtiń atap ótýinshe, 2,5 mıllıonnan astam múshesi bar elimizdiń Kásipodaq federatsııasy, onyń densaýlyq salasyndaǵy, taý-ken kásiporyndaryndaǵy, munaı-gaz keshenindegi, bank mekemelerindegi jáne memlekettik qyzmettegi kásipodaqtary ózderiniń kezekti sezderinde kezekten tys Prezıdenttik saılaýǵa N.Nazarbaevtyń kandıdatýrasyn usynyp otyr.