Qazaqstan kásipodaqtar federatsııasy Prezıdentke úndeý joldady
Prezıdent saılaýyna kandıdat usynǵan QR kásipodaqtar federatsııasy naýqan qarsańyndaǵy jumystaryn qorytyndylap, jıyn ótkizgen.
Jıynnan keıin odaq ujymy QR Prezıdenti Qasym-Jomart Toqaevqa Úndeý joldady. Kásipodaq quramyndaǵy eki mıllıon adamnyń atynan el Prezıdentin saılaýdaǵy jeńisimen quttyqtap bastalatyn úndeý mátininde birqatar usynystar da aıtylǵan.
«Biz Halyqaralyq eńbek uıymynyń 5 konventsııasyn, atap aıtqanda, «Áleýmettik qamsyzdandyrýdyń tómengi normalary týraly» 102-konventsııasyn, «Damýshy elderdi eskere otyryp, tómengi eńbekaqyny bekitý týraly» 131-konventsııasyn, «Ujymdyq kelissózderge járdemdesý týraly» 154-konventsııasyn, «Tolyq emes jumys ýaqyty jaǵdaıyndaǵy eńbek týraly» 175-konventsııasyn, «Aýyl sharýashylyǵyndaǵy eńbek gıgıenasy men qaýipsizdigi týraly» 184-konventsııasyn bekitý mańyzdy dep sanaımyz. Sondaı-aq, bıýdjet salasy qyzmetkerleriniń jalaqysyn esepteý kórsetkishin qaıta qarastyrý qajet» delingen úndeýde.
Qujatta Qazaqstan boıynsha óndiristik jaraqattyń kóp ekeni de aıtylady. Kásipodaq federatsııasy osy oraıda «Qaýipsiz eńbek» memlekettik baǵdarlamasyn qabyldaýdy usynady
«Eńbekti qorǵaýdy basqarý júıesin jetildirý, jazataıym jaǵdaılardyń aldyn alýdy kúsheıtý, jumysshylardyń talap qoıý úrdisin jáne kelisý úrdisterin ótkizýdi jeńildetý, ujymdyq sharttardy mindetti túrde jasaý boıynsha Eńbek zańnamasyn jetildirý qajettigi týyndap otyr» delingen úndeý mátininde.