Qazaqstan kásipqoı bokstaǵy tıtýldar sany boıynsha alǵashqy bestikke endi
ASTANA. QazAqparat - Qazaqstandyq boksshy Janat Jaqııanov (27-1, 18 KO) jeńil salmaqtaǵy WBA Super jáne IBO belbeýin jeńip alyp, elimizdiń kásipqoı bokstaǵy tıtýldar sany boıynsha alǵashqy bestikke kirýine atsalysty, dep habarlaıdy Sports.kz .
Endi qazaqstandyqtardyń qorjynynda tórt belbeý: úsheýi (WBA Super, WBC jáne IBF) Gennadıı Golovkınde (36-0, 33 KO) jáne bireýi (WBA Super) Jaqııanovta bar. Odan bólek, eki boksshy da IBO tıtýlyn ıemdengen. Alaıda, salystyrmaly túrde onyń bedeli tómen bolyp eseptelinedi.
Qazaqstan chempıondyq tıtýldar sany boıynsha besinshi oryndy Fılıppınmen bólisedi. Birinshi oryndy AQSh (12) alsa, keıingi oryndarda Ulybrıtanııa (9), Japonııa (8) jáne Meksıka (7) tur.
Sonymen qatar, Golovkınge kelip qosylǵan Jaqııanov álemniń qazirgi chempıondary boıynsha elder tizimindegi Qazaqstan pozıtsııasynyń joǵarylaýyna septigin tıgizdi. Qazaqstan altynshy oryndy Reseı, Kýba, Taıland jáne Ýkraına elderimen bólisedi. Qazirgi chempıondary eń kóp el AQSh (12) bolyp sanalady. Keıin Ulybrıtanııa (9), Japonııa (8), Meksıka (7) jáne Fılıppın (4) tur.
