Qazaqstan kásipqoı boks federatsııasy Fırýza Sháripovanyń múmkindigin baǵalady
ALMATY. QazAqparat - Qazaqstan kásipqoı boks federatsııasynyń vıtse-prezıdenti Vıktor Demıanenko Fırýza Sháripovanyń múmkindigin baǵalady, dep habarlaıdy QazAqparat tilshisi.
Vıktor Demıanenko boksshy Fırýzanyń bıyl Ketı Teılormen kezdese alatyndyǵyn aıtty. Bul týraly buǵan deıin boksshynyń menedjeri Sergeı Zavıleıskıı málimdegen bolatyn. Menedjer 2019-2020 jyldary Sháripova Ketı Teılormen judyryqtasatyny týraly kelisim jasalǵanyn jetkizdi.
Al, Vıktor Demıanenko atalmysh kezdesý bıyl ótýi kerek dep sanaıdy.
«Fırýza aldaǵy aıqasqa daıyn. Ol naǵyz babynda bolǵan kezde jekpe-jek ótýi tıis. Sonymen qatar, Ketı Teılor 2 jylda mansabyn jalǵastyra ma, toqtata ma ol jaǵy ázir belgisiz. Fırýzanyń baby kelisip tur. Ony meılinshe myqty qarsylastarmen kezdestirý kerek. Teılor - Sháripovanyń laıyqty qarsylasy», - dedi V. Demıanenko.
Kásipqoı boks federatsııasynyń vıtse-prezıdenti Fırýzanyń aldynda áli talaı myqtylar kezdesetinine senimdi.
«Ótken jekpe-jekke qaraǵanda bizdiń qyz óz salmaǵyndaǵylardy eńsere alatynyna senim mol. Oǵan myqty kóshbasshylarmen shyqqan durys. Natalıa Rogozınaǵa kil myqtylarmen shyǵasyń dep ýáde berip kelgendeı, bizdiń Fırýza da otyryp qalmasa eken deımiz», - dedi V.Demıanenko.
Aıta ketý kerek, Qazaqstandyq boksshy Fırýza Sháripova Almatyda ótken boks keshinde belgııalyq Djemılla Gontarıýkty jeńgen bolatyn.
IBO Championship jáne WBC Silver chempıony Fırýza Sháripova álemdik reıtıngtegi №2 sportshy ІBF versııasy boıynsha álem chempıony Frantsııalyq Maıva Hamadýshpen shyǵýy yqtımal. Jekpe-jek Monakoda ótetin boldy.
