Qazaqstan kásipkerleri Birikken Arab Ámirligine bal eksporttap jatyr
«Eksporttyq qarjylandyrý boıynsha paıyzdyq stavkany sýbsıdııalaý turǵysynda taǵy bir qadamǵa bastamashylyq ettik. Bul óz kezeginde syrtqy naryqtarǵa joǵary tehnologııalyq ónimdi jetkizý boıynsha sharttarǵa qoldaý jasaıdy. Qoldaýdyń osy túrin kútip otyrǵan kásiporyndar tizimi bar, olar jyl saıyn 300 mlrd teńgeden astam somaǵa osyndaı ónimdi eksporttaýǵa daıyn», - dedi mınıstr onlaın rejımde halyq aldynda esep berý kezinde.
Osy oraıda ol eksporttaýshylarmen táýlik boıy baılanysta bolý tetikteri eskerilgenin jetkizdi.
«Bıyl Lepsiden Birikken Arab Ámirligine 10 tonna bal jetkizýge kómektestik. Sonymen qatar, 22 tonna et ónimine avıaekspress uıymdastyrdyq. Ótken jyly alǵash ret bizdiń akkýmýlıatorlardy Italııaǵa eksporttaý iske asyryldy. Kambodjaǵa ushý-navıgatsııalyq trenajerlerin jónelttik. Bul óz kezeginde eksporttaýshylar úshin memlekettik qoldaý sharalary eleýli ekenin baıqatyp otyr», - dedi Sultanov.
