Qazaqstan qarjy sektorynyń qaıtalama sanktsııalarǵa túspeýi úshin tıisti sheshim qabyldady

ASTANA. QazAqparat – Elimizdegi ekinshi deńgeıli bankter Reseıge qatysty sanktsııa talaptaryn oryndaý baǵytynda tıisti rásimderdi kúsheıtti. Bul týraly QR Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty, dep habarlaıdy QazAqparat tilshisi.

«Sanktsııalar men olardyń qarjy sektorynda qoldanylýy máselesine toqtalsaq, Qazaqstandaǵy bankter, qarjy uıymdary AQSh-tyń, Ulybrıtanııanyń jáne Eýropanyń qarjy salasyndaǵy retteýshileri engizgen sanktsııa talaptaryn (Reseıge qatysty) saqtaý úshin tıisti rásimderin aıtarlyqtaı kúsheıtip jatyr», - dedi dedi Mádına Ábilqasymova Májiliste tilshiler suraǵyna jaýap bere otyryp.

Agenttik basshysy qazir bank júıesin sanktsııalardy aınalyp ótýge paıdalanbaý máselesine erekshe nazar aýdarylyp otyrǵanyn aıtty.

«Bul óte mańyzdy, tıisti sáıkestik protsedýralaryn ekinshi deńgeıli bankter de qamtamasyz etedi. Bul máseleni retteý úshin biz FATF talaptaryna sáıkes qarjy naryǵynyń árbir sektory úshin egjeı-tegjeıli talaptar men retteý qadamdaryn bekittik. ıAǵnı, bank sektory, saqtandyrý naryǵy, baǵaly qaǵazdar naryǵy jáne mıkroqarjy sektory úshin jeke qaýly men retteý qadamdary bar», - dedi ol.

Sonymen qatar ol elimizge sanktsııalar týraly eshqandaı eskertý kelmegenin aıtty.

«Qazaqstannyń qarjy sektoryna qaıtalama sanktsııalar salý qaýpin boldyrmaý úshin barlyq qajet qadamdardy qoldanyp jatyrmyz. Bul óte mańyzdy jáne biz retteýshi qurylymdardyń da, syrtqy korrespondent-bankterdiń de otandyq bankterimizge qoıǵan talaptaryn tolyǵymen oryndaımyz», - dedi Mádına Ábilqasymova.