Qazaqstan Qarýly Kúshteriniń jaýyngerlik sherýinde semeılik aqynnyń óleńi shyrqalady

SEMEI. QazAqparat - Otan qorǵaýshylar kúninde Jambyl oblysyndaǵy «Otar» 40-áskerı bazasynyń aýmaǵynda jaýyngerlik sherý ótedi. El áskeriniń qaýqary kórsetiletin jıynda sarbazdar semeılik aıtysker aqyn Nurjan Ómirbaıdyń sózine jazylǵan «Men qazaqpyn» ánin shyrqaıdy, dep habarlaıdy QazAqparat.

Jaýyngerlik sherýde úsh myńnan astam sarbaz Jarasqan Tólebaıdyń áni men Nurjan Ómirbaıdyń sózine jazylǵan «Men qazaqpyn» ánin shyrqaıdy.

Aıta keteıik, bul ándi ánshi Qýandyq Rahym oryndap júr. Nurjannyń aıtýynsha, «Men qazaqpyn» týyndysy Alash jurtynyń aýyzbirshiligin nyǵaıtýǵa baǵyttalǵan. Al jaýyngerlik sherýde 3 myń sarbazdyń shyrqaıtynyn estigende avtor qýanǵanyn jasyrmady.

«Qazir ǵalamtorda, áleýmettik jelide jáne qoǵam arasynda jaǵymsyz jaǵdaılar jıilep ketti. Bir-birin balaǵattap, jaǵadan alýǵa eshkim taısalmaıdy. Áldekimniń súringenin kórse, soǵan qýanatyn jaǵdaıǵa jetti. Tipti, otandastarymyzdyń jeńisti sátterine qýanyp, ortaqtasýdyń ornyna kemshiligin betine basyp, synap jatqandar az emes. Sol sebepti ulttyń bereke-birligin bekemdeıtin óleńniń kerektigin túsindim. Sondyqtan da osy óleńdi shyǵarýǵa týra keldi. Namystan týdy dese de bolady»,-deıdi Nurjan.

Nurjan Ómirbaı 1990 jyly 24 qańtarda, Aqsýat aýdanynda dúnıege kelgen. Aıtys arqyly tanylǵan aqyn Semeıdegi Shákárim atyndaǵy memlekettik ýnıversıtetiniń «Jýrnalıstıka» fakýltetiniń túlegi. Oblystyq, respýblıkalyq aqyndar aıtysynyń jeńimpazy. 2007 jyly Astana qalasynda ótken Muqaǵalı Maqataevqa arnalǵan jyr músháıranyń, 2008 jyly Taldyqorǵan qalasynda ótken Máshhúr-Júsip Kópeevke arnalǵan jyr músháırasynyń bas júldegeri. «Sáýir sáýlesi», «Aq arman» atty jyr jınaqtyń avtory.