Qazaqstan Qarýly Kúshteriniń tyly áskerı mindettilerdi daıyndyqtan ótkizdi
Atalǵan jıyn Qazaqstan Qorǵanys mınıstriniń áskerı mindettilerdi jınaqtaý jáne áskerı bólimderdiń jaýyngerlik jáne jumyldyrý ázirligin arttyrý jónindegi buıryǵyna sáıkes uıymdastyrylyp otyr. Jıynda áskerı mindettiler áskerı jáne arnaýly bilimderin shyńdap, tapsyrmalardy oryndaý barysyndaǵy daıyndyq deńgeıin joǵarylatyp, dalalyq sheberligin pysyqtady.
«Tyl basqarmasynyń 12881 áskerı bólimine iriktelip alynǵan áskerı mindettiler rota komandıri, aǵa tehnık, júrgizýshi-mehanık jáne dánekerleýshi laýazymdaryna mamandandyryldy. Olar jıyn barysynda avtomobıl tehnıkasyn ýaqtyly jáne sapaly jóndeýdi uıymdastyrýǵa, jóndeýdiń ozyq ádisterin meńgerýge, buzylǵan avtotehnıkany evakýatsııalaýǵa, tehnıkany durys paıdalaný men ony udaıy jaýyngerlik ázirlikte ustaýǵa mashyqtandyryldy»,-delingen QR QM baspasóz qyzmetiniń málimetinde.
Jıynǵa jalpy sany 100 áskerı mindetti tartyldy, onyń ishinde zapastaǵy ofıtserler, serjanttar jáne sarbazdar sanatyndaǵy áskerı mindettiler bar. Olar Almaty qalasy men Almaty oblysynyń qorǵanys isteri jónindegi basqarmalary men bólimderinen iriktelip alyndy.
12881 áskerı bóliminiń shoǵyrlandyrý aýdanynda ornalasqan oqý-jattyǵý ortalyqtary áskerı mindettilermen kúndelikti sabaqtar ótkizýge arnalǵan áskerı tehnıkalarmen, jaýyngerlik parkpen jáne oqý synyptarymen qamtamasyz etildi. Jıyn áskerı bólimdegi jeke quramdy qarsy alý pýnktinen bastaý alyp, ári qaraı oqý-jattyǵý polıgonynda jalǵasyn tapty.
«Qazirgi Qarýly Kúshterdiń oqý-materıaldyq bazasy men jaýyngerlik tehnıkasy joǵary deńgeıge kóterilgenine kóz jetkizdim. Osy bir aı ishinde kásibı deńgeıimizdi joǵarylatýǵa, komandırler men bastyqtardyń buıryqtary men talaptaryn naqty oryndaýǵa mashyqtandyq»,-deıdi rota komandıri aǵa leıtenant A. Álimqulov.
Áskerı mindettilerdiń arasynda az ǵana kúnniń ishinde jıynǵa kelýdegi maqsatyn túsinip, júktelgen tapsyrmalardy tyńǵylyqty oryndaýda joǵary jetistikterimen kózge túskender basshylyq tarapynan marapattaldy.