Qazaqstan Qarýly Kúshteriniń Qurlyq áskerlerinde komandırlik daıyndyq boıynsha ofıtserler jıyny bastaldy
Oǵan Qurlyq áskerlerine qarasty bólimder men quramalardyń komandırleri qatysýda. Jıyndy ótkizý orny retinde Astana qalasy men Qurlyq áskerleriniń oqý ortalyǵy ornalasqan Gvardeısk garnızony belgilenip otyr. Bul týraly QR QM-niń baspasóz qyzmetinen habarlady.
Áskerı bólim komandırleri 10 kún boıy áskerlerdi qoldaný máseleleri, jaýyngerlik ázirlikti uıymdastyrý jáne basqa da taqyryptar boıynsha synaqtar men emtıhandar tapsyrady.
Buǵan deıin komandırlik daıyndyqtar bólimder ornalasqan jerlerde ǵana ótkiziletin. Bıyl ekinshi jyl bul sekildi jıyndar kýrstyq daıyndyq ádisimen belgilengen jıyn beketterine shyǵý arqyly ótkizilip keledi.
Komandırlerdi jańa ádispen testileý ıdeıasynyń avtory Qurlyq áskerleriniń bas qolbasshysy general-leıtenant Murat Maıkeev komandırlik daıyndyq boıynsha osyndaı tásilmen synaqtar ótkizý óte tıimdi deıdi. Sebebi olardyń bilimi men biliktiligin joǵary turǵan shtab ofıtserleri baǵalaıdy. Sol sebepti de komandırler synaqqa óte muqııat daıyndalyp keledi. Bul tásil olardyń kásibı deńgeıin meılinshe durys baǵalaýdy qamtamasyz etetin bolady.
Jıyn barysynda komandırler tájirıbe almasyp, jaýyngerlik daıyndyq pen bólimniń kúndelikti qyzmetin uıymdastyrýdaǵy ádis-tásilderimen ózara bólisetin bolady. Sonymen qatar, Qurlyq áskeriniń bas qolbasshysy synaqtardy tikeleı baqylaý arqyly komandırlerdiń kásibı ósý deńgeıin kórý múmkindigine ıe bolady.