Qazaqstan Qarýly Kúshteriniń 20 jyldyǵyna oraı shyǵarylǵan mektep oqýshylary shyǵarmalary jınaǵynyń tanystyrylymy ótti

Uıymdastyrýshylardyń málimetterinshe, atalmysh jınaqty shyǵarý úshin 2011-2012 jyldary mektep oqýshylary arasynda Otan qorǵaý, patrıotızm taqyrybynda shyǵarmalar men fotosýretterdiń respýblıkalyq baıqaýy uıymdastyrylǵan. Osy baıqaýdyń nátıjesinde «Qazaqstan áskeri, patrıotızm» atty shyǵarmalar jınaǵy jaryq kórdi.

 Qazaqstandyq mektep oqýshylarynyń úzdik shyǵarmalarynyń jınaǵy Astana qalalyq Іshki ister basqarmasynyń tapsyrysymen daıyndalǵan jáne atalmysh kitapqa elimizdiń 16 óńirindegi oqýshylardyń úzdik eńbekteri engen. Shyǵarmalar baıqaýyna Astana men Almaty jáne Aqtóbe, Pavlodar, Qostanaı jáne Soltústik Qazaqstan oblysy jastarynyń erekshe  úles qosqandyǵyn aıta ketý kerek. Atalmysh jınaqqa barlyǵy qazaq jáne orys tilderinde 591 oqýshydan shyǵarmalar men fotosýretter jiberilgen.

 «Men úshin Otanǵa degen súıispenshilik pen ony qasterleı bilýdiń úlgisi Uly Otan soǵysynda jaýlarymen aıamaı kúresken ata-babalarymyzdyń erlikteri»,-deıdi Astanadaǵy №53 mekteptiń 7-shi synyp oqýshysy Absamat Abylaıhanov.

 Al jınaqqa shyǵarmalary engen ózge oqýshylar otansúıgishtik pen patrıotızmniń úlgisi olardyń jaýynger ákeleri men týystary ekendigin aıtady. Jalpy alǵanda jınaqqa engen shyǵarmalardy oqı otyryp, oqýshylardyń Qazaqstannyń Qarýly Kúshteriniń qalaı qalyptasqandyǵynan aıtarlyqtaı habardar ekendigin baıqaýǵa bolady.

 Astana qalasynyń Іshki saıasat basqarmasy osymen úshinshi mektep oqýshylarynyń jınaǵyn shyǵaryp otyr. 2010 jyly «Astana men Prezıdent» atty jınaq jaryq kórgen bolatyn. Al 2011 jyly «Jeńis, jady, patrıotızm. Jeńimpazdardyń nemereleri soǵys týraly» atty kitap shyqty.