Qazaqstan Qarýly Kúshterindegi úzdik serjanttar anyqtaldy

ASTANA. 12 qazan. QazAqparat - Búgin «Otar» 40-áskerı bazasynda Qazaqstan Qarýly Kúshteriniń úzdik serjanty ataǵyna besinshi kezekti baıqaý aıaqtaldy. Oǵan Qarýly Kúshter túrleriniń, ásker tekteriniń, óńirlik qolbasshylyqtardyń, arnaıy áskerlerdiń, áskerı oqý oryndarynyń úzdik serjanttary qatysty. Baıqaý áskerı-kásiptik turǵyda eń myqty daıyndalǵan serjanttardy anyqtaý maqsatynda jyl saıyn ótkiziletindigin eske salamyz. Bul týraly Qorǵanys mınıstrliginiń baspasóz qyzmetinen habarlandy.

Shara qorytyndysy boıynsha «Qarýly Kúshter túriniń, ásker tekteri men óńirlik qolbasshylyqtardyń úzdik serjanty» atalymynda shtab-serjanty Rınat Súıindikov úzdik dep tanylǵan. Al «Úzdik brıgada serjanty» atalymyn №32363 áskerı bóliminiń serjanty
2-synypty serjant Dáýlet Esberdınov ıelense, №61993 áskerı bóliminiń áskerı qyzmetshisi 2-synypty serjant Dáýren Myrzabaev «Úzdik batalon serjanty» ataǵyna ıe boldy.

«Úzdik rota serjanty» ataǵyna bas júlde №18404 áskerı bóliminiń ókili 3-synypty serjant Aleksandr Ponomarenkoǵa buıyrdy. Osy áskerı bólimniń áskerı qyzmetshisi kishi serjant Qanat Qurmanov «Úzdik vzvod serjanty» dep tanylsa, «Úzdik bólimshe serjanty» ataǵyn №28079 bólimshe komandıri kishi serjant Jalǵas Abdýaıpov jeńip alǵan.