Qazaqstan Qarýly Kúshterinde Aýǵan soǵysyna qatysqandarǵa qurmet kórsetilýde
Dástúr boıynsha áskerı bólimder men quralymdardyń bárinde aýǵan soǵysynyń ardagerlerin quttyqtap, qurmet kórsetildi, sondaı-aq surapyl soǵystan oralmaǵandardy eske aldy, dep habarlaıdy QR Qorǵanys mınıstrliginiń baspasóz qyzmeti.
«Astana», «Shyǵys», «Batys» jáne «Ońtústik» óńirlik qolbasshylyqtarynda jaýynger aýǵandyqtarmen saltanatty kezdesýler ótip, áskerı qyzmetshiler Aýǵan soǵysynda qaza bolǵandardyń jaqyndary men týystaryn aralady. Semeı qalasynda aýǵandyqtarǵa arnalǵan eskertkish mańynda ótken saltanatty mıtıngige jergilikti ardagerler keńesimen birge Semeı garnızony men áskerı orkestrdiń jeke quramy, qoǵam ókilderi jáne jastar qatysyp, atalǵan eskertkishke gúl shoqtaryn qoıdy. Osyndaı is-sharalar Aıagóz, Úsharal jáne Óskemen garnızondarynda da ótti.
Astanada Aeroutqyr áskerleriniń áskerı qyzmetshileri aýǵan soǵysyna qatysqan jaýyngerlerdiń monýmentine gúl shoqtaryn qoıdy, sonymen qatar desanttyq shabýyldaý brıgadasy atys qarýynan oq atý boıynsha týrnır ótkizdi. QR QK Ulttyq áskerı-patrıottyq ortalyǵynda bul kúni Aýǵan soǵysynyń ardagerlerine saltanatty qurmet kórsete otyryp, merekelik kontsert qoıyldy.
Sol sııaqty Áskerı-teńiz kúshterinde aýǵan ardagerleriniń qatysýymen 29011 áskerı bóliminde ashyq esik kúni uıymdastyryldy. Áýe qorǵanysy kúshteriniń bólimderi men quramalarynda jalpy bilim berý mektepteriniń joǵary synyp oqýshylary men merzimdi áskerı qyzmetke «Kúz-2016» boıynsha shaqyrylǵan sarbazdar úshin Aýǵan soǵysynyń ardagerleri sóz sóılep, «Erlik sabaqtary» ótti.
Jastardy áskerı-patrıottyq turǵyda tárbıeleý maqsatynda «Jas ulan» respýblıkalyq mektebinde, joǵary áskerı oqý oryndarynda, QR QM Kadet korpýsynda Aýǵan soǵysyna qatysqandarmen kezdesý uıymdastyryldy. Olar bolashaq Otan qorǵaýshylarmen jaýyngerlik tájirıbelerimen bólisip, beıbitshilikti saqtaýdy jáne soǵys jóninde áńgimelep berdi.
Qarýly Kúshterdiń áskerı qyzmetshileri soǵys sabaqtary olardy áli kúnge deıin kóp nársege úıretetinin atap ótti. Aýǵanstanda bizdiń ofıtserler men qatardaǵy sarbazdar áskerı boryshqa, janqııarlyqqa, joǵary jaýyngerlik rýh pen dostyqqa adaldyǵyn kórsete otyryp, erlik pen batyrlyqtyń ozyq úlgilerin tanytty. Búgingi kúni Qazaqstannyń Qarýly Kúshterinde Aýǵan soǵysyna qatysqan áskerı qyzmetshiler az emes. Olar qazaqstandyq armııanyń damýy men qorǵanys qabiletin nyǵaıtýǵa óz úlesterin qosa otyryp, áskerı qyzmetin laıyqty atqaryp keledi. Al kóbi zapasta bolsa da Qorǵanys mınıstrliginde ótkiziletin áskerı-patrıottyq is-qımyldarǵa belsendi túrde qatysady.
