Qazaqstan Qarýly Kúshterinde alǵashqy sport keńesi quryldy
Bul týraly QR Qorǵanys mınıstrliginiń baspasóz qyzmetinen habarlady. Keńes tóraǵasy - QR QM Armııa ortalyq sport klýbynyń bastyǵy polkovnık Erlan Talasbaev, al onyń quramyna ásker túrleri men tekterinde, óńirlik qolbasshylyqtarda dene daıarlyǵy jáne sport úshin jaýapty áskerı qyzmetshiler, Qazaqstandaǵy áskerı oqý oryndarynyń dene daıarlyǵy kafedralarynyń ókilderi endi.
Qurylǵan sport keńesi áskerı qyzmetshiler men olardyń otbasylary, áskerge shaqyrtylýǵa deıingi jasóspirimder arasynda buqaralyq sportty damytýǵa, salaýatty ómir saltyn jáne armııa sportshylarynyń jetistikterin belsendi nasıhattaýǵa septigin tıgizedi. Sondaı-aq QR Qarýly Kúshteri aýqymynda jarystardy jáne sportqa qatysty is-sharalardy, QR QK qurama komandasyna sportshylardy irikteý jumystaryn uıymdastyrý jáne ótkizý tártibin qadaǵalaıdy. Keńes ásker túrleri, tekteri, óńirlik qolbasshylyqtar, áskerı bólimder men mekemelerdiń qolbasshylyǵymen ózara is-qımyl aıasynda dene daıarlyǵy men buqaralyq sport jumystary is-sharalaryn tıimdi uıymdastyrý týraly usynystar ázirleýdi josparlap otyr.
Eń mańyzdy máselelerdi sport keńesi keminde jylyna eki ret ótetin otyrystarda talqylaıtyn bolady.