Qazaqstan Qarýly Kúshteri memlekettik tildi ıgerýde júıeli jumys júrgizýde

ASTANA. 13 qarasha. QazAqparat - Áskerlerdegi 2013 oqý jylyndaǵy jaýyngerlik daıarlyq qorytyndysymen qatar Qazaqstan Respýblıkasynyń Qarýly Kúshteriniń áskerı qyzmetshileri men qyzmetkerlerine memlekettik tildi oqytý sabaqtarynyń qorytyndysy shyǵaryldy, dep habarlady Qazaqstan Respýblıkasy Qorǵanys mınıstrliginiń baspasóz qyzmetinen.

Búgingi tańda QR Qorǵanys mınıstrligi Elbasymyz Nursultan Ábishuly Nazarbaevtyń «Qazaqstan-2050» Strategııasy: qalyptasqan memlekettiń jańa saıası baǵyty» atty Joldaýynda aıtylǵan 2025 jylǵa qaraı qazaqstandyqtardyń 95 paıyzy qazaq tilin bilýge tıis degen mindetti iske asyrý jóninde belsendi jumys júrgizip keledi. QR Qorǵanys mınıstrliginiń Memlekettik tildi damytý basqarmasynyń uıymdastyrýymen Qarýly Kúshteriniń jeke quramymen memlekettik tildi oqytý sabaqtary ótkizilip keledi. Bastaýysh, jalǵastyrýshy jáne tereńdetip oqý toptaryna bólingen til úırenýshiler oqý jylynyń ekinshi kezeńi boıynsha emtıhan tapsyrdy. Sabaqqa qatysýshylar buǵan deıingi jartyjyldyq sońynda synaq tapsyrǵan bolatyn. Sonymen qatar osy oqý kezeńinde memlekettik tildi úırenýshiler referattar qorǵap, túrli taqyryptarda jeke tapsyrmalardy oryndady. QR Qarýly Kúshterinde 2013 jylǵy 5 jeltoqsanda «Memlekettik tildiń úzdik oqytýshysy», «Memlekettik tildiń úzdik aýdarmashysy» baıqaý-konkýrtaryn ótkizý josparlanyp otyr. Baıqaý-konkýrsta memlekettik tildi damytý mamandarynyń shyǵarmashylyq jumystary, ǵylymı jetistikteri, ádistemelik jáne kórneki quraldary usynylady jáne olarǵa taldaý jasalady. Baıqaý-konkýrsynyń nátıjesi boıynsha úzdik óner kórsetken oqytýshylar men aýdarmashylar baǵaly syılyqtarmen marapattalady.