Qazaqstan Qarýly Kúshteri qatarynda qyzmet etýge zapastaǵy ofıtserler shaqyrylýda
Bul týraly QR Qorǵanys mınıstrliginiń baspasóz qyzmetinen habarlandy.
Elimizdiń barlyq óńirlerinde úgitteý-túsindirý sıpatyndaǵy is-sharalar uıymdastyrylýda. Buqaralyq aqparat quraldary arqyly halyqty kelisimshart boıynsha áskerı qyzmetke qabyldaý tártibi týraly habardar etý júrgizilip keledi.
Halyqty qamtý aýqymyn ulǵaıtý maqsatynda kelisimshart boıynsha áskerı qyzmetke irikteýdiń 61 pýnkti quryldy, olardyń ishindegi 34 statsıonarlyq pýnkt qorǵanys isteri jónindegi departamentter men basqarmalardyń bazasynda óristetilse, 11 pýnkt halyqqa qyzmet kórsetý ortalyqtarynda áreket etýde. Bir pýnkt Astana qalasynyń temir jol vokzalynda jumys isteýde. Budan basqa respýblıka boıynsha kelisim-shart boıynsha áskerı qyzmetke irikteýdiń 15 jyljymaly pýnktiniń jumysy uıymdastyrylǵan.
2013 jyldyń naýryz aıynan bastap áskerı qyzmetke qabyldaý pýnktteri arqyly 2000-ǵa jýyq adam keńes alyp, 900-den astam zapastaǵy ofıtser áskerı qyzmetke qabyldaý týraly baıanat jazdy.
Qazirgi ýaqytta Astana, Almaty qalalarynyń jáne Almaty jáne Ońtústik Qazaqstan, Jambyl, Qyzylorda, Shyǵys Qazaqstan jáne Pavlodar oblystarynyń qorǵanys isteri jónindegi departamentterinde kandıdattardy irikteý is-sharalary júrgizildi. Qarýly Kúshterde qyzmet etýge nıet bildirgen 697 kandıdattyń ishinen 300-ge jýyq daıarlyǵy joǵary zapastaǵy ofıtser tańdap alyndy.
Jasaqtaýdyń jańa júıesi zapastaǵy ofıtserlerdi ortalyqtandyrylǵan irikteý jolymen áskerı qyzmetke qabyldaýdy kózdeıdi. Bul qujattardy qaraý, sheshim qabyldaý merzimderin qysqartýǵa, Qarýly Kúshterdi zapastaǵy áskerı qyzmetshilermen jasaqtaýdyń tıimdiligi men sapasyn arttyrýǵa múmkindik beredi.
Aǵymdaǵy jyldyń qazan aıynda irikteý is-sharalary Batys Qazaqstan oblysynyń Qorǵanys isteri jónindegi departamentinde ótkiziletin bolady.