Qazaqstan Qarýly Kúshteri dabyl boıynsha kóterildi
Mınıstrliktiń baspasóz qyzmetinen málim etkendeı, oqý-jattyǵýdyń negizgi maqsaty áskerı basqarý organdarynyń úılesimdiligin jetildirý, áskerlerdiń dalalyq mashyǵyn arttyrý jáne áskerlerdiń basqarýda shtabtar men komandırlerdiń turaqty praktıkalyq daǵdylaryn shyńdaý bolyp tabylady.
«Oqý-jattyǵýdyń manevrine shamamen 8 myń áskerı qyzmetshi jáne 2 myńnan astam qarý-jaraq pen áskerı tehnıka, maıdandyq jáne armııalyq avıatsııa tartyldy. Oqý-jattyǵýǵa Qurlyq áskerleri, Áýe qorǵanysy kúshteri, Arnaıy operatsııalar kúshteri, arnaıy áskerler men materıaldyq-tehnıkalyq qamtamasyz etý bólimderi men bólimsheleri tartyldy. Strategııalyq komandalyq-shtabtyq oqý-jattyǵýǵa qatysýshylar quramdastyrylǵan tásilmen, óz júrisimen, temirjol kóligimen, áskerı-kólik avıatsııasynyń ushaqtarynda kórsetilgen aýdanǵa qozǵalys jasap, belgilengen aýdanǵa shoǵyrlanyp, oqý-jaýyngerlik tapsyrmalardy oryndaýǵa kiristi», - delingen mınıstrlik aqparatynda.
Málim bolǵandaı, áskerlerdiń temirjol kóligimen qozǵalýy úsh baǵyt boıynsha júzege asyryldy. Oǵan 20-dan asa áskerı eshelon tartyldy. 400-den astam áskerı tehnıka dittegen jerge segiz kolonna bolyp jetti. Qozǵalystyń uzyndyǵy - 300-1000 shaqyrymnan astam.
Oqý-jattyǵý ótkiziletin aýmaqtaǵy jaǵdaı qazirgi kezdegi qarýly qaqtyǵystardyń tájirıbesi negizinde shynaıy jaýyngerlik is-qımyldarǵa jaqyndatylyp jasaldy. «Kóktal» polıgonynda materıaldyq-tehnıkalyq qamtamasyz etýdiń ortalyq bazasy ornalastyryldy. Onda azyq-túlik, kıim-keshek jáne tehnıkalyq múlik, janar-jaǵarmaı materıaldary, áskerler toptamasynyń jaýyngerlik qyzmetiniń qajettiligi úshin oq-dárilerge arnalǵan qoımalar bar. Sondaı-aq jyljymaly mobıldi áskerı-dalalyq gospıtal uıymdastyryldy.
«Aıbalta - 2019» strategııalyq komandalyq-shtabtyq oqý-jattyǵýy Almaty oblysynyń «Kóktal» oqý-jattyǵý polıgonynda ótkizilip jatyr jáne ol aǵymdaǵy jylǵy 3 mamyrǵa deıin jalǵasady.
