Qazaqstan Qarýly Kúshteri basshy quramynyń oqý-ádistemelik jıynyn ótkizýge ázirlik jumystary bastalyp ketti
Qarýly Kúshter túrleri bas qolbasshylary, óńirlik áskerı qolbasshylyqtar basshylary, brıgada komandırleri men olardyń orynbasarlary úshin lektsııalar oqylyp, polıgonda batalondyq-taktıkalyq jattyǵýlar, jaýyngerlik mashınalar parkinde parktik-sharýashylyq jumystary kórsetiletin bolady.
Jıyn barysynda qazaqstandyq ásker basshylary jaýyngerlik mashınalardy júrgizýden, atýdan jáne dene tárbıesi daıyndyǵynan emtıhandar tapsyrady. Jıyndy ótkizetin nysannyń ázirligimen QR Qorǵanys mınıstrligi shtabtar bastyqtary tóraǵasynyń orynbasary general-maıor M. Dúısekeevtiń jetekshiligimen, «Ońtústik» óńirlik qolbasshylyǵynyń basshylyǵy, sondaı-aq Gvardeıskıı garnızony áskerı bólimderiniń ókilderi aınalysýda.
Daıyndyq jumystaryn jalpy úılestirý maqsatynda Gvardeıskıı qalashyǵyna Qorǵanys mınıstrliginiń ortalyq apparatynyń bir top ofıtserleri jumyldyryldy. Olardy Shtabtar bastyqtary komıteti tóraǵasynyń birinshi orynbasary general-maıor M.Dúısekeev bastap keldi.
Jıynǵa qatysýshylardyń jalpy sany 220-dan astam adam. Olarǵa dáris beretin jáne emtıhan qabyldaıtyn arnaıy top qazirdiń ózinde tapsyrma alyp, basshylyq quramnyń bilimi men biliktiligine ádil baǵa berýge ázir.
«Basshylyq quram ofıtserleri jıyn jumysyna belsene qatysa otyryp, ózderiniń kásibı deńgeıin kórsetedi ári bilimderin jetildiretin bolady», - deıdi general-maıor Muqan Dúısekeev.
Onyń aıtýynsha, oqý-ádistemelik jáne kórsetiletin sabaqtar komandırlerge jaýyngerlik, tehnıkalyq, tyldyq qamtamasyz etýdi uıymdastyrýda biregeı ádisterdi meńgerýge septigin tıgizbek. Ofıtserler ózara tájirıbe almasyp, basqa bólimdermen birlesip is-qımyl jasap, berilgen tapsyrmany oryndaýǵa mashyqtanbaq.
