Qazaqstan Qarýly Kúshteri barlaý toptarynyń «Altyn Úki» jarysyn ótkizýde

ASTANA. 12 shilde. QazAqparat - Qaraǵandy oblysyndaǵy Spassk oqý-jattyǵý ortalyǵynda shet memleketter qarýly kúshteri ókilderiniń qatysýymen arnaıy maqsattaǵy barlaý toptarynyń «Altyn Úki» halyqaralyq jarysy bastaldy.

Halyqaralyq deńgeıdegi is-sharaǵa qatysý úshin oqý ortalyǵyna Qazaqstan, Reseı, Iordanııa, Qytaı jáne Tájikstan qarýly kúshteriniń bólimsheleri keldi, dep habarlaıdy elimizdiń Qorǵanys mınıstrliginen.

Barlaýshylar bul synda joǵary dene daıarlyǵy deńgeıin jáne atys daıyndyǵyn, mına jarý isindegi, áskerı-medıtsınalyq jáne radıo daıarlyq boıynsha bilimderin, beıtanys jerde baǵdarlaý jáne kartamen jumys isteı bilý daǵdylaryn dáleldeýi kerek.

Jarys birneshe kezeńnen turady. Olar birinen soń biri demalyssyz ótkiziletin bolady. Bul qatysýshylar úshin tózimdilik synaǵy da bolmaq.

Barlaý toptaryna úsh shaqyrymnan turatyn «barlaýshy jolaǵynan» ótýge týra keledi. Ol qabyrǵa, tikenek symdar, jartastar jáne sý kedergileri sııaqty elýden astam elementten turady. Kedergiler jolaǵynan ótý barlaýshylardan aıtarlyqtaı dene daıarlyǵy men psıhologııalyq daıarlyqty, eptilik pen shydamdylyqty talap etedi.

Búgingi kúni barlaý toptary túngi jaǵdaıda 30 shaqyrymdyq marsh jasap, arnaıy is-sharalar oryndaıtyn aýdanǵa shyqty.

«Altyn Úki» halyqaralyq jarysynyń sheshýshi kezeńi qarý-jaraqpen
10 shaqyrymdyq marsh jasaýmen aıaqtalady.

Jarystyń nátıjesi senbi, 13 shilde kúni málim bolmaq.