Qazaqstan Qarýly kúshteriniń shyǵarmashylyq ujymy Máskeýde qoshemetke ıe boldy
ASTANA. KAZINFORM — Qazaqstan Qarýly kúshteriniń Ulttyq áskerı-patrıottyq ortalyǵyna qarasty Ortalyq áskerı orkestr men Ortalyq ansambldiń mýzykanttary men ártisteri Máskeýde ótken XVII Halyqaralyq «Spassk munarasy – 2025» áskerı-mýzykalyq festıvalinde tabysty óner kórsetti. Іs-shara Uly Jeńistiń 80 jyldyǵyna arnaldy.
Reseı Federatsııasynyń basty sahnasy — Qyzyl alańda Qazaqstan Qorǵanys mınıstrliginiń Qurmet qaraýyly rotasy qazaq ánderinen quralǵan popýrrı áýeniniń súıemeldeýimen áserli defıle usyndy. Bul kórinis kórermender tarapynan ystyq yqylas pen zor qoshemetke bólendi.
Ortalyq áskerı orkestrdiń oryndaýyndaǵy dala saryny — qazaqtyń ulttyq áýenderi men keńestik kezeńnen tanymal shyǵarmalar Reseı jurtshylyǵyna da etene tanys bolyp shyqty. Kórermender erekshe áser alǵanyn jasyrmady.
Bıyl Keńes Odaǵynyń Batyry, aty ańyzǵa aınalǵan mergen Álııa Moldaǵulovanyń týǵanyna 100 jyl tolýyna oraı «Jas sarbaz» balalar shyǵarmashylyq stýdııasynyń tárbıelenýshisi, halyqaralyq baıqaýlardyń laýreaty Jasmına Túzelova «Álııa» ánin oryndap, kórermenderge erekshe kóńil-kúı syılady. Seıdolla Báıterekovtiń bul týyndysy osydan 50 jyl buryn Bolgarııada ótken halyqaralyq festıvalde «Jyl áni» atanyp, qazaq mýzykasynyń shetelge keń taralýyna jol ashqan edi.
Qazaqstan Qarýly kúshteri áskerı orkestrler qyzmetiniń bastyǵy — bas áskerı dırıjer podpolkovnık Almas Ibragımov.
Festıvaldiń taqyrybyna saı, biz Máskeýge Ekinshi dúnıejúzilik soǵysyna qatysqan qazaq kompozıtory Nurǵısa Tilendıevtiń shyǵarmalarynan quralǵan popýrrı — «Týǵan el», «Sarjaılaý» jáne «Óz elim» ánderin ala keldik, — dep atap ótti.
Bıyl 30 jyldyǵyn atap ótip jatqan Qazaqstan Qarýly kúshteri Ortalyq áskerı orkestriniń bul óner kórsetýi Qyzyl alańdaǵy kórermender tarapynan zor qoshemetke ıe boldy. Etnıkalyq saryndarǵa baı kompozıtsııalar kórermender úshin tosyn bolmasa da, shynaıy áser men erekshe emotsııa syılady.
Aıta keteıik, XVII Halyqaralyq «Spassk munarasy» áskerı-mýzykalyq festıvaline Reseımen qatar Azııa, Afrıka jáne Eýropa elderinen kelgen 25 shyǵarmashylyq ujym qatysyp otyr. Festıvaldiń saltanatty ashylý rásimi Reseıdiń Memlekettik týy kúnine oraı uıymdastyryldy.
Aıta ketelik «Batys» óńirlik qolbasshylyǵy qataryn jas ofıtserler tolyqtyrdy.