Qazaqstan Qarýly Kúshterinde josparly tekserý júrgiziledi
ASTANA. KAZINFORM — QR Qorǵanys mınıstri Dáýren Qosanov Qarýly Kúshterdiń áskerı basqarý organdary men áskerı bólimderine josparly tekserý júrgizedi. Bul týraly vedomstvonyń baspasóz qyzmeti habarlady.
Osyǵan oraı 16-18 aqpan aralyǵynda Almaty, Qonaev jáne Taldyqorǵan qalalarynda áskerı tehnıkalar tasymaldanady. Soǵan baılanysty avtojoldardyń jekelegen ýchaskelerinde qozǵalysqa ýaqytsha shekteýler engizilýi múmkin.
— Qazaqstan Respýblıkasynyń azamattaryn, buqaralyq aqparat quraldarynyń ókilderin jáne áleýmettik jeli qoldanýshylaryn jalǵan aqparatqa senbeýge jáne tek resmı aqparat kózderine súıenýge shaqyramyz, — delingen habarlamada.
Eske sala keteıik, Memleket basshysy Qasym-Jomart Toqaev «Túrkistan» gazetinde jarııalanǵan suhbatynda Qarýly Kúshterdegi tártip máselelerin jeke baqylaýyna alatynyn aıtqan bolatyn.