Qazaqstan Qarýly kúshterinde jańa kásibı mereke alǵash ret atalyp ótti
ASTANA. KAZINFORM – Búgin Qazaqstan Respýblıkasynyń Qarýly kúshterinde jańa kásibı mereke – Áýe qorǵanysy kúshteriniń Maıdandyq avıatsııa kúni alǵash ret atalyp ótip jatyr.
2025 jyly Qorǵanys mınıstriniń buıryǵymen bekitilgen bul ataýly kún esimi otandyq jáne álemdik avıatsııa tarıhyna altyn árippen jazylǵan dańqty ushqyshtardyń erligimen tyǵyz baılanysty.
Bul kúnniń 5 tamyzǵa belgilenýiniń de ózindik máni bar. Dál osy kúni, 1922 jyldyń 5 tamyzynda aty ańyzǵa aınalǵan áskerı ushqysh-shabýyldaýshy, eki márte Keńes Odaǵynyń batyry, avıatsııa general-maıory Talǵat Bıgeldınov dúnıege kelgen. Ekinshi dúnıejúzilik soǵys jyldarynda ol belgili Il-2 shabýyldaýshy ushaǵymen 305 jaýyngerlik ushý oryndap, teńdessiz erlik, naǵyz ushqyshqa tán sheberlik jáne Otanǵa adaldyqtyń úlgisin kórsetti.
– Maıdandyq avıatsııa kúniniń 5 tamyzǵa belgilenýi – dańqty jerlesimiz Talǵat Bıgeldınovke, onyń maıdandas serikterine kórsetilgen qurmet ári búgingi áskerı ushqyshtardyń, ınjenerler men tehnıkterdiń eńbegin moıyndaýdyń belgisi. Shabýyldaýshy ushqyshtardyń sheberi atanǵan qaharmannyń erligi áli kúnge deıin áskerı qyzmetshilerdi oqý-jaýyngerlik mindetterdi minsiz oryndaýda, kásibı sheberligin shyńdaýda jáne kúrdeli ushý tásilderin jetildirýde jigerlendirip keledi, – dedi Áskerı-áýe kúshteriniń qolbasshysy avıatsııa general-maıory Asqar Іzbasov.
Qazaqstannyń qazirgi maıdandyq avıatsııasy ańyzǵa aınalǵan maıdanger ushqyshtar qalyptastyrǵan jaýyngerlik dástúrdiń zańdy jalǵasy jáne olardyń isin abyroımen jalǵastyryp, eldiń áýe shekarasyn senimdi qorǵap júr.
Zamanaýı kópfýnktsııaly Sý-30SM joıǵysh ushaqtarymen jáne jańǵyrtylǵan Sý-25 shabýyldaýshy ushaqtarymen jaraqtandyrylǵan maıdandyq avıatsııa – Áýe qorǵanysy kúshteriniń negizgi quramdas bólikteriniń biri. Ol qoıylǵan mindetterdi barynsha utqyrlyqpen, dáldikpen jáne tıimdilikpen oryndaıdy.
Ataýly dataǵa oraı elimizdiń barlyq negizgi avıatsııalyq bazalarynda áskerı qyzmetshiler men Qarýly kúshterdiń ardagerlerin qurmetteý rásimderi, batyr qyrandardyń eskertkishterine gúl shoqtaryn qoıý, sondaı-aq áskerı avıatsııanyń dańqty dástúrlerin jas urpaqqa nasıhattaýǵa arnalǵan kezdesýler ótkizilip jatyr.
Aıta ketelik «Ashyq aspannan» áýe habyna deıin: elimizdiń avıatsııalyq júıesi qalaı qalyptasyp jatqany týraly jazǵan edik.
