Qazaqstan Qarýly kúshteri halyqaralyq kıbersaıysta úzdik úshtikke endi
ASTANA. KAZINFORM — Astanada KazHackStan 2026 halyqaralyq konferentsııasy aıasynda Qazaqstan, Ózbekstan, Ázerbaıjan, Qyrǵyzstan jáne basqa da memleketterdiń komandalary qatysqan CyberKumbez halyqaralyq kıbersaıysy ótti. Bul týraly Qorǵanys mınıstrligi málim etti.
Saıysqa Qazaqstan Qarýly kúshteriniń atynan Bas shtabtyń Kıberqaýipsizdik ortalyǵynyń komandasy qatysty.
Praktıkalyq kezeńder zamanaýı qalanyń ınfraqurylymyn, sonyń ishinde asa mańyzdy ınfraqurylym nysandaryn, bank jáne ónerkásip sektorlaryn, áskerı nysandar men basqa da aqparattyq júıelerdi quraıtyn arnaıy kıberpolıgonynda ótkizildi.
Qatysýshylar kıbershabýyldardy anyqtaý jáne taldaý, osal tustardy saralaý, aqparattyq júıelerdi qorǵaý jáne olardyń shtattyq jumysyn qalpyna keltirý boıynsha tapsyrmalardy oryndady. Sondaı-aq kıberoqıǵalarǵa qarsy jedel áreket etýge jáne ózgermeli kıberorta jaǵdaıynda aqparattyq ınfraqurylymnyń turaqtylyǵyn qamtamasyz etýge erekshe nazar aýdaryldy.
Saıys qorytyndysy boıynsha Qazaqstan Qarýly kúshteri Bas shtabynyń Kıberqaýipsizdik ortalyǵynyń komandasy úshinshi orynǵa ıe bolyp, halyqaralyq jarystyń júldegerleri qatarynan kórindi.
KazHackStan 2026-ǵa qatysý áskerı qyzmetshilerge sheteldik mamandarmen tájirıbe almasyp, kıberqaýipsizdik salasyndaǵy praktıkalyq daǵdylaryn jetildirýge múmkindik berdi.
Eske sala keteıik, buǵan deıin Qazaqstanda alǵashqy áskerı-ınjenerlik chempıonat ótken bolatyn.
