Qazaqstan Qarýly kúshteri áskerı fototilshisiniń jumystary fotoentsıklopedııaǵa endi
Qorǵanys mınıstrligi Medıa-kontent ortalyǵy Prıozersk garnızony baspasóz qyzmetiniń bastyǵy leıtenant Dýman Qurmanǵalıevtyń sýretteri fotoentsıklopedııaǵa endi. Bul týraly Kazinform QR Qorǵanys mınıstrligi baspasóz qyzmetine silteme jasap habarlaıdy.
L.N. Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetinde «Qazaq fotoshejireshileri ІІІ: tarıh, derek, óner» atty fotoentsıklopedııanyń tusaýkeseri ótti.
Onda qoǵam sanasyn foto arqyly memlekettik múddege, ulttyq muraǵa, estetıkalyq talaptarǵa jumyldyra bilgen qaıratkerlerdiń shyǵarmashylyǵy jáne ulttyq fotoóner tarıhy jan-jaqty baıandalady.
Fotoentsıklopedııa qazaqtyń tuńǵysh fotografy qazaqtyń birtýar aqyny, Jáńgir hannyń nemeresi Sháńgereı Bókeevtiń túsirgen sýretterimen bastalady. Sháńgereı túsirgen fotosýretterden qazir on shaqtysy belgili. Sháńgereı 1901 jyly Peterborǵa saparynan keıin fotoónermen aınalysqan.
Kitapqa Qorǵanys mınıstrligi Medıa-kontent ortalyǵy Prıozersk garnızony baspasóz qyzmetiniń bastyǵy leıtenant Dýman Qurmanǵalıevtiń birqatar jumysy engizilgen. Dýman qazaqstandyq medıa keńistikte jáne áleýmettik jelilerde áskerı taqyryptaǵy sýretterimen tanymal. Avtordyń birqatar jumysy búgin tusaýy kesilgen jańa jınaqtan kórinis tapqan.
Áskerı fototilshiniń jumystary jeke quramnyń jaýyngerlik oqý-jattyǵýlarynda, ıaǵnı, áskerı polıgondarda dúnıege kelgen.
Leıtenant Dýman Qurmanǵalıev E. Býketov atyndaǵy Qaraǵandy memlekettik ýnıversıteti «Bastapqy áskerı daıyndyq» fakýltetiniń túlegi. Fotoónermen stýdenttik shaqtan aınalysyp keledi. 2003 jyldan bastap Qazaqstan Qarýly kúshterinde qyzmet atqaryp keledi. «Astana» óńirlik áskerleri qolbasshysynyń basqarmasynda fototilshi bolyp qyzmet istegen.
Leıtenant D. Qurmanǵalıev Qazaqstan Jýrnalıster odaǵynyń fotojýrnalıst Rahymbaı Hanaly atyndaǵy arnaıy syılyǵynyń ıegeri. Onyń esimi 2016 jyly elimizdegi úzdik fotograftar tizimine kirgen.
2017 jyly Táýelsizdiktiń 25 jyldyǵyna oraı «Kazahstanskaıa pravda» gazeti uıymdastyrǵan «Meniń Qazaqstanym» atty respýblıkalyq fotokórmede júldeli ІІ oryn alǵan.
Túrli-tústi fotosýretti bul eńbek: «Fotograftar shyǵarmashylyǵy», «Fotoóner jáne ǵylym» jáne «Fotoóner» qoǵamdyq birlestiginiń jobalary» atty úsh taraýdan turady. Bir aıta keterligi, jınaq úsh tilde, ıaǵnı qazaq, orys jáne aǵylshyn tilderinde jaryq kórgen. Fotoentsıklopedııaǵa redaktsııalyq alqanyń sheshimimen jalpy sany 18 avtor engen.