Qazaqstan Qarýly kúshteri áskerı baılanysshylar kúnin atap ótip jatyr
ASTANA. KAZINFORM - 1994 jyldyń 31 qazanynda Qorǵanys mınıstriniń dırektıvasymen QR Qarýly kúshteri Bas shtabynyń Baılanys basqarmasy quryldy. Bul ataýly data Qazaqstan armııasyndaǵy áskerı baılanystyń zamanaýı júıesin damytýdyń negizi boldy, dep habarlaıdy QR Qorǵanys mınıstrliginiń baspasóz qyzmeti.
Qazirgi ýaqytta baılanys áskerleri zamanaýı avtomattandyrylǵan basqarý júıelerimen, derekterdi berý toraptaryn qorǵaý quraldarymen, radıorelelik jáne spýtnıktik keshendermen jabdyqtalǵan joǵary mobıldi bólimsheler bolyp tabylady.
Baılanys áskerleriniń mamandary táýlik boıy baǵynysty quramalardy, bólimderdi, bólimshelerdi, jaýyngerlik quraldar men qarýdy úzdiksiz ári udaıy basqarady. Olar ózderiniń joǵary kásibıligin strategııalyq, komandalyq-shtabtyq, arnaıy jattyǵýlar men oqý-jattyǵýlarda qashanda dáleldep keledi.
Bıylǵy ótken «Jaýyngerlik dostastyq», «Desant», «Aıbalta», «Beket» jattyǵýlarynda áskerı baılanysshylardyń úılesimdi, saýatty is-qımyldary qoıylǵan mindetterdi tabysty oryndaýdyń kepili boldy. Olardy júrgizý kezinde áskerı qyzmetshiler dalalyq toraptardy ornalastyrýdy, baılanys jelileriniń turaqty jumys isteýin, barlyq deńgeıdegi shtabtar men bólimsheler arasynda qorǵalǵan aqparat almasýdy qamtamasyz etti.
Magıstranttar men doktoranttardy beıindi baǵyttar boıynsha kásibı daıarlaý QR Ulttyq qorǵanys ýnıversıtetiniń baılanys jáne aqparattyq qaýipsizdik kafedrasynda júzege asyrylady. Baılanys ofıtserlerin Almaty Radıoelektronıka jáne baılanys áskerı-ınjenerlik ınstıtýtynda, serjanttar quramyn Saǵadat Nurmaǵambetov atyndaǵy astanalyq áskerı kolledjde daıyndaıdy. Almaty oblysyndaǵy baılanys áskerleriniń oqý ortalyǵynda merzimdi qyzmet sarbazdary kishi deńgeıdegi áskerı-eseptik mamandyqtardyń negizderin úırenedi.
Áskerlerdi basqarý júıesinde áskerı baılanysshylar senimdi kommýnıkatsııa kepili bolyp tabylady. Olar áskerlerdiń kúndelikti ómirin, jaýyngerlik kezekshilikti, jaýyngerlik daıyndyqty uıymdastyrýdy, odan basqa Qarýly kúshterdiń qazirgi zamanǵy syn-tegeýrinder men qaýip-qaterlerge árkez daıyndyǵyn qamtamasyz etedi. Olar bul mıssııany abyroımen, jaýapkershilikpen jáne joǵary kásibı deńgeıde oryndaıdy.
Osyǵan deıin Qazaqstan Áskerı-teńiz kúshteriniń kemeleri qysqa daıyn ekeni týraly jazdyq.