Qazaqstan kartopy tıelgen vagondar Ózbekstan aýmaǵyna ótkizildi

NUR-SULTAN. QazAqparat – Qazaqstan shekarasynan eksportqa jiberilmegen kartop tıelgen vagondar Ózbekstan aýmaǵyna 28 qańtarda ótkizildi. Bul týraly QR Qarjy mınıstrligi Memlekettik kirister komıtetinen málim etti, dep habarlaıdy QazAqparat.

Habarlamaǵa sáıkes, atalǵan kartop ónimderi el aýmaǵynan jekelegen azyq-túlik ónimderin eksportqa shyǵarýǵa salynǵan tyıym kúshine enbeı turyp rásimdelgen.

«28 qańtardaǵy jaǵdaı boıynsha, shyǵarýǵa salynǵan tyıym kúshine engenge deıin resimdelgen kartop ónimi bar vagondardyń Qazaqstan Respýblıkasy aýmaǵynan Ózbekstan Respýblıkasyna shyǵarylǵanyn habarlaımyz», - delingen vedomstvo málimetinde.

Eske salaıyq,áleýmettik mańyzy bar azyq-túlik taýarlarynyń baǵasyn turaqtandyrý maqsatynda jáne Syrtqy saýda saıasaty men halyqaralyq ekonomıkalyq uıymdarǵa qatysý máseleleri boıynsha vedomstvoaralyq komıssııasynyń 2021 jylǵy 25 qarashadaǵy sheshimi negizinde QR Aýyl sharýashylyǵy jáne Qarjy mınıstrleriniń Qazaqstan Respýblıkasy aýmaǵynan kartop jáne sábizdi áketýge 3 aı merzimine tyıym salýdy qarastyratyn birlesken buıryǵy qabyldanǵan bolatyn.