Qazaqstan karateshileri Azııa chempıonatynan úsh qola medal jeńip aldy
ASTANA. QazAqparat - Iordanııa astanasy Ammanda karateden ótken (WKF) Azııa chempıonatynda otandastarymyz úsh qola medal jeńip aldy, dep habarlaıdy QazAqparat tilshisi.
Atalǵan júldeniń birin qyzdar arasynda 55 kelige deıingi salmaqta el namysyn qorǵaǵan Arýjan Muhtar enshilese, qalǵan ekeýin uldar arasynda synǵa túsken sportshylar el qorjynyna saldy.
Naqtyraq aıtar bolsaq, erler arasynda 55 kelige deıingi salmaqta baq synaǵan Dáýlet Shymyrbekov pen 67 kelige deıingi salmaqta óner kórsetken Asylbek Muratov qola medal ıegerleri atandy.
Osy oraıda aıta keteıik, Ammandaǵy Azııa chempıonatyna Qazaqstannyń ekinshi nómirli sportshylary qatysqan bolatyn. Karateden negizgi quram Azııa oıyndaryna daıyndalyp jatyr.
