Qazaqstan Qarashyǵanaq gaz óńdeý zaýytyn salý jumysyn jedeldetip jatyr
ASTANA.KAZINFORM — Astanada Energetıka mınıstri Erlan Aqkenjenovtyń tóraǵalyǵymen Qarashyǵanaq gaz óńdeý zaýytynyń qurylysy máseleleri boıynsha keńes ótti. Bul týraly vedomstvonyń baspasóz qyzmeti habarlady.
Energetıka mınıstri qýattylyǵy jylyna 5 mlrd m³ deıin gaz óńdeıtin Qarashyǵanaq GÓZ-in salý Memleket basshysynyń tikeleı tapsyrmasy jáne gaz salasyn damytýdyń 2029 jylǵa deıingi keshendi josparynyń negizgi elementi ekenin atap ótti.
Jobanyń basty maqsaty — ishki naryqtyń taýarlyq gazǵa ósip kele jatqan qajettiligin óteý jáne tarıhı turǵyda Orynbor GÓZ-ine táýeldi óńdeý qýattaryn ártaraptandyrý arqyly ımportqa táýeldilikti tómendetý.
Kezdesý barysynda Erlan Aqkenjenov jobanyń iske asyrylý barysy týraly esepterdi tyńdady. Qazirgi ýaqytta jobanyń ekonomıkalyq tıimdiligi rastaldy jáne Qytaıdyń «CITIC Construction» korporatsııasymen yntymaqtastyqtyń bazalyq prıntsıpteri týraly kelisimge qol qoıyldy. FEED (bazalyq jobalaý) kezeńine daıyndyq júrip jatyr, sondaı-aq jer ýchaskesi, ınfraqurylym jáne shıkizat bazasymen qamtamasyz etý máseleleri pysyqtaldy.
Strategııalyq jobanyń biryńǵaı operatory bolyp «QazaqGaz» ulttyq kompanııasy belgilendi. Bul sheshim praktıkalyq iske asyrý satysyna jedel ótý qajettiliginen jáne kompanııanyń iri gaz aktıvterin basqarýdaǵy uzaq merzimdi beıindi tájirıbesine baılanysty qabyldandy.
Qatysýshylar Qarashyǵanaq jobasynyń sheteldik aktsıonerlerimen kelissózder barysyna erekshe nazar aýdardy. Mınıstr shıki gazdy kepildi jetkizý, baǵa belgileý (ishki naryqtyń rentabeldiligin qamtamasyz etý úshin ádil bosatý baǵasyn qalyptastyrý) jáne zaýytty ken ornynyń qoldanystaǵy ınfraqurylymymen ıntegratsııalaý (brownfield) máselelerin tezirek retteý qajettigin atap ótti. Sonymen qatar keńes barysynda gazdy kádege jaratqany úshin tólem mehanızmin (Evacuation fee) ádil retteý máselesi kóterildi.
Energetıka mınıstri Erlan Aqkenjenov kelissózderdiń sozylýy jobanyń belsendi qurylys kezeńine ótýine kedergi keltirip otyrǵanyn aıtty.
— Qazaqstan úshin bul zaýyttyń mańyzy zor, sondyqtan jobanyń bastalý merzimin sheksiz keıinge qaldyrýǵa jol berilmeıdi. Memleketke nátıje kerek. Joba qarqyndy túrde jáne bizdiń ulttyq ekonomıkalyq múddelerimizge tolyq sáıkes iske asyrylýy tıis. Konsortsıýmnan syndarly jáne jedel ustanym kútemiz, — dedi Erlan Aqkenjenov.
Mınıstr joba ulttyq múddeler úshin barynsha tıimdi júzege asyrylýy kerek ekenin, al barlyq qatysýshylarmen ortaq mámilege kelý — jaqyn bolashaqtaǵy basym mindet ekenin jetkizdi. Tapsyrmalardyń oryndalýy men jobanyń iske asyrylý barysy erekshe baqylaýǵa alyndy.
Mınıstr aqpan aıynda zaýyttyń jobalyq qujattaryn ázirleý bastalǵany týraly aıtqan bolatyn.
