Qazaqstan qarasha aıyna deıin terrorızmdi qarjylandyrýǵa qatysty kemshilikterdi túzetýi kerek - A. Teńgebaev
Atalǵan qujattyń negizgi maqsaty qoldanystaǵy zańnamadaǵy quqyqtyq olqylyqtardy joıý, Qazaqstan ratıfıkatsııalaǵan halyqaralyq konventsııalardyń erejelerin iske asyrý, Birikken Ulttar Uıymy Qaýipsizdik Keńesiniń Qararlaryn iske asyrý tetigin jasaý, jáne qylmystyq jolmen alynǵan kiristerdi zańdastyrýǵa, terrorızmdi qarjylandyrýǵa qarsy is-qımyl salasyndaǵy zańnamany halyqaralyq standarttarǵa sáıkes keltirý bolyp tabylady. Budan bólek, zań jobasy qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl jónindegi Eýrazııalyq toptyń 14-shi jalpy otyrysynda qabyldanǵan Qazaqstan Respýblıkasyn ózara baǵalaý týraly eseptegi eskertýlerdi iske asyrý maqsatynda da ázirlendi.
«Qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń 14-shi jalpy otyrysy byltyr 17-20 maýsym aralyǵynda ótken bolatyn. Osynyń nátıjesinde aqshany jylystatýǵa jáne terrorızmdi qarjylandyrýǵa qarsy kúrestiń qarjylyq sharalaryn ázirleý tobynyń usynymdary boıynsha Qazaqstannyń eleýli kemshilikterdi joıýda alǵa jyljyǵany atalyp ótildi. Bul salada ulttyq zańnamadaǵy jumystardy jalǵastyrý usynyldy. Atap aıtqanda, Qazaqstan 2015 jyldyń qarasha aıyna deıin sáıkes emes, ishinara sáıkestikteri bar barlyq usynymdarǵa qatysty kemshilikterdi túzetý boıynsha eleýli sharalar qabyldaýymyz kerek», - dedi Qarjy vıtse-mınıstr Ardaq Teńgebaev.
Tutastaı alǵanda, zań jobasyn qabyldaý arqyly Qazaqstan kóleńkeli ekonomıkaǵa qarsy is-qımyl maqsatynda qarjy monıtorıngi sýbektileriniń tizbesin keńeıtýge, terrorızmdi qarjylandyrýdy boldyrmaý maqsatynda terrorızmdi jáne ekstremızmdi qarjylandyrýmen baılanysty tulǵalar men uıymdardyń aktıvterine tyıym salý tetigin belgileýge, toqtatyla turǵan (tyıym salynǵan) qarajattyń terrorızmdi jáne ekstremızmdi qarjylandyrýmen baılanysty uıymdar men tulǵalardyń tizbelerine engizilgen tulǵalardyń negizgi tynys-tirshilik muqtajdary úshin qajetti bóligine qol jetkizýge ruqsat berý tetigin belgileýge yqpal etedi.