«Qazaqstan-Qaraǵandy» telearnasy ataýyn «Saryarqa» dep ózgertti
ASTANA. QazAqparat - 28-shi tamyzdan bastap «Qazaqstan» teleradıokorporatsııasynyń medıa resýrstarynda jańa maýsym bastalady. «Qazaqtan-Qaraǵandy» telearnasy rebrendıng júrgizdi, endi ol «SARYARQA» dep atalatyn bolady. Bul týraly Qaraǵandy oblysynyń óńirlik kommýnıkatsııalar qyzmetinde bolǵan brıfıngte respýblıkalyq «Qazaqstan» teleradıokorporatsııasynyń oblystyq bólimshesi dırektorynyń orynbasary Jánibek Sadyqanov málimdedi.
- Barlyǵyńyz bilesizder, «Qazaqstan-Qaraǵandy» telearnasy respýblıkalyq «Qazaqstan» teleradıokorporatsııasynyń bólimshesi bolyp tabylady. Jyl saıyn kúzde barlyq arnalarda jańa maýsym bastalady, bıylǵy maýsym erekshe bolmaq. Birinshiden rebrendıng júrgiziledi. Dúısenbi, 28-shi tamyzdan bastap teleradıokorporatsııasynyń baırlyq aımaqtardaǵy bólimshelerinde telearnalardyń logotıpteri men ataýlary ózgeredi. Bizdiń arna endi «SARYARQA» dep atalatyn bolady. Biz bul ataýdy ádeıi tańdadyq, sebebi ol tutastaı bizdiń oblysymyzdy bildiredi. Biz Qazaqstannyń barlyq aımaqtaryna habar taratamyz, sondyqtan ár kórermen arnanyń ataýynan-aq Saryarqa - bul Qaraǵandy, Qaraǵandy oblysy ekenin biletin bolady, - deıdi Jánibek Sadyqanov.
Sondaı-aq onyń sózinshe, jańa maýsymda «SARYARQA» telearnasynda jańalyqtar men birneshe baǵdarlamala efırge jańasha túrde shyǵady. Kelesi jyly eki jańa jobany ashý josparlanýda.
Korporatsııasynyń baspasóz qyzmetiniń habarlaýynsha, rebrendıngtiń basty maqsaty - korporatsııanyń barlyq medıa aktıvterine tán, ulttyq dástúrdi áıgileıtin, korporatsııanyń jańa álemdik standarttarǵa talpynysyn kórsetetin - birtutas tanymal belgi qurý.Teleradıokorporatsııanyń endigi ataýy - «QAZAQSTAN».
Bólimshelerdegi logotıpte birdeı kók jáne sary túster bolady.Olar Qazaqstan Respýblıkasynyń memlekettik týy ispetti jasalǵan.
