Qazaqstan - qant dıabetimen aýyratyn naýqastarǵa ınsýlın pompalaryn tegin beretin álemdegi jalǵyz memleket - QR DSM
ASTANA. 30 qańtar. QazAqparat - Qazaqstan Respýblıkasynyń Densaýlyq saqtaý mınıstrliginiń Jaýapty hatshysy S.Mýsınovtyń «Medtronık» (AQSh) kompanııasynyń ókilderi: dıabetologııa salasyndaǵy klınıkalyq zertteýler jónindegi vıtse-prezıdenti Fraýn Kaýfmanmen jáne klınıkalyq zertteýler jónindegi bas mamany L. Edıgarovamen kezdesýi bolyp ótti.
Bul týraly QR Densaýlyq saqtaý mınıstrliginiń baspasóz qyzmetinen habarlady.
Qazaqstan 2012 jyldyń basynan beri mańyzdy qadamǵa baryp, 1 tıpti qant dıabetine shaldyqqan 5-15 jas aralyǵyndaǵy balalarǵa osy atalǵan kompanııa óndirgen ınsýlın pompalaryn memleket qarajaty esebinen satyp ala bastady.
Jobanyń negizgi maqsaty - múgedektikke aparyp soǵatyn jáne naýqastardyń ómirin eleýli túrde qıyndatatyn asqynýlardyń damýyn tómendetý. Bul sharanyń taǵy bir mańyzdylyǵy, Qazaqstan - qant dıabetimen aýyratyn naýqastarǵa ınsýlın pompalaryn tegin beretin álemdegi jalǵyz memleket.
Kezdesý barysynda jobany júzege asyrý máseleleri talqylandy. Qazirgi ýaqytta ınsýlın pompalary qant dıabetine shaldyqqan 5-15 jas aralyǵyndaǵy 607 balaǵa ornatyldy. Joba aıasynda osy ınsýlın pompalarymen jumys isteıtin 90 endokrınolog-dáriger oqytyldy.
Jobanyń tıimdiligin baǵalaý úshin arnaýly ındıkatorlar ázirlendi. 2012 jyldyń nátıjesinde balalardyń qant dıabetine syrqattanýshylyq salasynda oń ózgerister (ketoatsıdoz jáne aýyr gıpoglıkemııa oqıǵalary azaıdy, naýqastardyń ómir sapasy jaqsardy) baıqaldy.
Jobany júzege asyrý jalǵasady.
