Qazaqstan kanaldarynda sý ysyraby eki ese qysqartylady
ASTANA. KAZINFORM — Qazaqstanda 2030 jylǵa deıin 42 jańa sý qoımasy salynady. Sondaı-aq 37 sý qoımasy men 110 gıdrotehnıkalyq qurylys qaıta jańǵyrtylyp, 14,5 myń shaqyrym kanal jóndeledi.
Bul týraly Sý resýrstary jáne ırrıgatsııa vıtse-mınıstri Jandos Sálimov baıandady.
Vıtse-mınıstrdiń aıtýynsha, 2024-2025 jyldary jalpy uzyndyǵy 1,4 myń shaqyrymnan asatyn 190 kanal qaıta jańǵyrtylǵan. Budan bólek, 5 sý qoımasy men 8 gıdrotehnıkalyq qurylys jóndeýden ótti.
Aýyz sýmen jabdyqtaý baǵytynda 945 myńnan astam turǵyny bar 321 eldi mekendi qamtıtyn 22 nysannyń rekonstrýktsııasy aıaqtaldy.
— Sý resýrstaryn basqarý júıesin damytýdyń 2030 jylǵa deıingi tujyrymdamasyna sáıkes, 42 jańa sý qoımasyn salý, 37 sý qoımasy men 110 gıdrotehnıkalyq qurylysty rekonstrýktsııalaý, 14,5 myń km kanaldy, onyń ishinde 3,5 myń km kanaldy tsıfrlandyrý elementterin engizý arqyly jańǵyrtý, sondaı-aq 557 gıdrotehnıkalyq qurylysjaıdy kópfaktorly zertteý júrgizý josparlanyp otyr, — dedi J. Sálimov Ortalyq kommýnıkatsııalar qyzmetinde ótken baspasóz máslıhatynda.
Qazir elimizde 4,6 myń shaqyrymnan astam kanalda qurylys jáne jóndeý jumystary júrip jatyr. Sonyń ishinde bıyl 962 shaqyrym kanaldaǵy jumysty aıaqtaý kózdelgen. Bul shamamen 200 myń gektar sýarmaly jerdiń sýmen qamtamasyz etilýin jaqsartýǵa múmkindik beredi.
— Strategııalyq maqsat — 2030 jylǵa qaraı kanaldardaǵy sý ysyrabyn 50 paıyzdan 25 paıyzǵa deıin azaıtý, — dedi vıtse-mınıstr.
Aıta keteıik, Qytaıda Qazaqstannyń 23 sý salasynyń mamany oqyp jatyr.
