Qazaqstan Kambodjaǵa bıdaı men et eksporttaýdy kózdep otyr
ASTANA. KAZINFORM — Qazaqstan men Kambodja aýyl sharýashylyǵy ónimderiniń saýdasyn keńeıtip, eksport kólemin arttyrýdy, sondaı-aq ónim óńdeý jáne ınvestıtsııa tartý baǵyttarynda birlesken jobalardy iske asyrý múmkindikterin qarastyrýdy josparlap otyr.
Bul týraly aýyl sharýashylyǵy mınıstri Aıdarbek Saparovtyń Kambodja Koroldiginiń Aýyl sharýashylyǵy, orman sharýashylyǵy jáne balyq sharýashylyǵy mınıstri Dıt Tınamen kezdesýinde aıtyldy.
— Qazaqstan Kambodjamen agrarlyq áriptestikti nyǵaıtý úshin zor áleýetke ıe. Elimizde astyq jáne et ónimderiniń eksportyn ulǵaıtýǵa múmkindik beretin damyǵan shıkizat bazasy men óndiristik múmkindik bar. Biz eksport aýmaǵyn keńeıtýge, saýda baılanystaryn nyǵaıtýǵa jáne ózara tıimdi bastamalardy iske asyrýǵa múddelimiz. Osy maqsattaǵy júıeli jumys ekijaqty yntymaqtastyqqa tyń serpin beretinine senimdimin, — dedi Aıdarbek Saparov.
Basym baǵyttardyń biri — astyq saýdasyn damytý. Bul salada elimizdiń áleýeti joǵary. Máselen, sońǵy eki jyl qatarynan astyq daqyldarynyń jalpy túsimi 27 mln tonnadan asty. Ótken jyly astyq eksporty 15,3 mln tonnaǵa jetip, aldyńǵy jyldyń sáıkes kezeńimen salystyrǵanda 70%-ǵa ósti. Bul — sońǵy 20 jyldaǵy eń joǵary kórsetkish.
Osy múmkindikterdi eskere otyryp, Qazaqstan tarapy jergilikti naryqtyń qajettilikterin, ónim sapasyna qoıylatyn talaptardy jáne logıstıkalyq jaǵdaılardy nazarǵa ala otyryp, Kambodjaǵa bıdaı jetkizý máselesin pysyqtaýdy usyndy.
Kezdesý barysynda et ónimderiniń eksportyn damytý máselesine de erekshe nazar aýdaryldy. Taraptar qazaqstandyq sıyr jáne qoı etin, onyń ishinde halal talaptaryna sáıkes keletin ónimderdi jetkizý joldaryn qarastyrdy.
Óz kezeginde Dıt Tına qazaqstandyq aýyl sharýashylyǵy ónimderiniń, sonyń ishinde alma men et ımportynyń kólemin ulǵaıtýǵa múddeli ekenin bildirdi. Sondaı-aq balyq ósirý salasyndaǵy saýda baılanystaryn damytý múmkindikteri talqylandy.
— Biz Qazaqstanmen agrarlyq saladaǵy áriptestikti nyǵaıtýǵa múddelimiz. Kezdesý ózara saýdany kúsheıtýge múmkindik bar ekenin kórsetti. Kelisilgen baǵyttar boıynsha jumysty jalǵastyryp, negizgi ýaǵdalastyqtardy yntymaqtastyq týraly memorandýmmen bekitýdi usynamyz, — dedi mártebeli meıman.
Aldaǵy jumysty úılestirý maqsatynda Aıdarbek Saparov birlesken jumys tobyn qurýdy usyndy. Top ózara ónim jetkizý sharttaryn pysyqtaý, eki eldiń naryqtaryna aýyl sharýashylyǵy ónimderin shyǵarýǵa qatysty máselelerdi sheshý, óndirýshiler men ımporttaýshylar arasynda tikeleı baılanys ornatý, sondaı-aq ónim óńdeý jáne ınvestıtsııa salalaryndaǵy birlesken jobalardyń múmkindikterin baǵalaý jumystarymen aınalysady.
Kezdesý sońynda taraptar eki el arasyndaǵy seriktestikti nyǵaıtýǵa jan-jaqty daıyn ekenderin jetkizdi.
Ásirese, saýda baılanystaryn damytýǵa jáne birlesken bastamalardy tıimdi júzege asyrýǵa basa kóńil bólinbek.
Eske salsaq, 17 qazanda Kambodja Premer-mınıstri Qazaqstanǵa resmı saparmen keldi.
Memleket basshysy Qasym-Jomart Toqaev pen Kambodja Premer-mınıstri Hýn Manet shaǵyn quramda kelissóz júrgizdi.
Prezıdent Kambodjamen tsıfrlandyrý salasyndaǵy yntymaqtastyqty keńeıtýdi usyndy.
