Qazaqstan Kambodjaǵa agrarlyq ónim eksportyn ulǵaıtýǵa daıyn
ASTANA. KAZINFORM — Qasym-Jomart Toqaev Kambodja Premer-mınıstrimen kezdesti. bul týraly Aqordanyń baspasóz qyzmeti habarlady.
Shanhaıda ótken Dúnıejúzilik jasandy ıntellekt jónindegi konferentsııa aıasynda Prezıdent Qasym-Jomart Toqaev Kambodja Premer-mınıstri Hýn Manetpen kezdesti.
Memleket basshysy Qazaqstan Kambodjamen berik dostyqqa jáne ózara qurmetke negizdelgen seriktestikti joǵary baǵalaıtynyn jetkizdi.
Qazaqstan Prezıdenti eki el arasyndaǵy saýda-ekonomıkalyq yntymaqtastyqqa tyń serpin berý úshin áleýet mol ekenin atap ótti.
Prezıdenttiń pikirinshe, taýar aınalymyn arttyratyn perspektıvti baǵyttar qataryna aýyl sharýashylyǵy, toqyma óndirisi, týrızm, qurylys, taǵam ónerkásibi, kólik-logıstıka salalary kiredi.
Atap aıtqanda, elimiz bıdaı, tyńaıtqysh jáne basqa da agrarlyq ónimder tasymalyn ulǵaıtýǵa ázir.
Budan bólek, BUU elektrondyq úkimetti damytý ındeksindegi úzdik 24 eldiń sapyna enetin Qazaqstan ozyq tehnologııa salasyndaǵy tájirıbesimen bólise alady.
Premer-mınıstr Hýn Manet Kambodjanyń Qazaqstanmen qarym-qatynasty nyǵaıtýǵa múddeli ekenin rastady.
Ol eki eldiń úkimetteri men isker toptary arasyndaǵy baılanystardy nyǵaıtýdyń mańyzyna toqtalyp, birlesken jobalarǵa jan-jaqty qoldaý kórsetýge daıyn ekenin jetkizdi.
Áńgimelesý barysynda Prezıdent pen Premer-mınıstr jahandyq jáne aımaqtyq qurylymdar aıasyndaǵy yqpaldastyq jóninde pikir almasty.
Qasym-Jomart Toqaev AÓSShK qyzmetine qoldaý kórsetkeni úshin Kambodja tarapyna rızashylyq bildirdi. Sondaı-aq Premer-mınıstrge Astananyń BUU janynan Halyqaralyq sý uıymyn qurý jónindegi bastama kótergenin aıtty.
Kezdesý sońynda Hýn Manet Qazaqstan Prezıdentin ózine qolaıly ýaqytta Kambodjaǵa saparmen kelýge shaqyrdy.
Aıta ketelik Qasym-Jomart Toqaev Taıland Premer-mınıstrin elge shaqyrǵan edi.
