Qazaqstan qamaýǵa alynǵan adamdar sany jaǵynan 35-orynda tur
ASTANA. 13 qańtar. QazAqparat - Qazaqstan qamaýǵa alynǵandar sany jaǵynan álem elderiniń arasynda 35-orynda tur. Bul týraly búgin Parlament Májilisindegi Úkimet saǵatynda málim boldy.
Іshki ister mınıstri Qalmuhanbet Qasymovtyń aıtýynsha, búgingi kúni Qazaqstanda qamaýǵa alynǵandar sany el ımıdjine jaǵymdy sıpatta emes. «Biz bul kórsetkishter qatarynan shyǵýymyz kerek. Osy turǵydan alǵanda qazir Parlamentte talqylanyp jatqan Qylmystyq, Qylmystyq is júrgizý kodeksiniń jobalaryndaǵy usynystar túrmelerde otyrǵandar sanyn azaıtýǵa múmkindik beredi dep oılaımyn. Al qazirgi kúni túrmedegilerdiń sany 49 myń adamǵa jetip otyr», - deıdi mınıstr Q. Qasymov.
Budan bólek, mınıstr túrmede otyrǵandardy eńbekpen qamtý máselesiniń de ózekti ekenin alǵa tartty. «Bul rette kolonııalardyń el ekonomıkasyna qosar úlesi týraly sóz bolyp otyrǵan joq. Ondaı kezeń artta qaldy. Degenmen, búgingi túrmeler qarjylyq jaǵynan memleketke júk. Al kolonııalarda otyrǵan eńbekke jaramdy 24 myń adamnyń tek jartysynan sál astamy ǵana jumys isteıdi», - deıdi Q. Qasymov.
