Qazaqstan qaldyqtardy basqarýdy tsıfrlandyryp, qaıta óńdeýdi kúsheıtedi
ASTANA. KAZINFORM - «Jasyl damý» AQ Qazaqstanda qaldyqtardy basqarýdyń jańa júıesin qalyptastyrý ústinde. Jańa júıe salany basqarýdy ortalyqtandyrýdy, protsesterdi tsıfrlandyrýdy, qaldyqtar naryǵyn damytýdy jáne qaıta óńdeýdi qoldaý tetikterin engizýdi kózdeıdi, dep habarlaıdy QR Ekologııa jáne tabıǵı resýrstar mınıstrliginiń baspasóz qyzmeti.
Negizgi baǵyttardyń biri – qaldyqtardy basqarýdyń ortalyqtandyrylǵan júıesin qurý. «Jasyl damý» AQ-ǵa Qaldyqtardy basqarý ulttyq ortalyǵy (QBUO) mártebesi berildi. Ortalyqtyń mindeti – qaldyqtar aǵyndaryn úılestirý, memlekettik organdar, óńirler men bıznes arasyndaǵy ózara is-qımyldy qamtamasyz etý, sondaı-aq salanyń jumys isteýiniń biryńǵaı ári ashyq tetikterin engizý.
Jańa júıeniń mańyzdy baǵyttarynyń biri – salany tsıfrlandyrý. Qoǵam qaldyqtardyń túzilýinen bastap qaıta óńdelýine deıingi barlyq kezeńde olardyń qozǵalysyn qadaǵalaýǵa múmkindik beretin tsıfrlyq platformany engizý máselesin pysyqtap jatyr.
Platforma aıasynda qaldyq túzýshilerdiń tsıfrlyq pasporttaryn, qaldyqtardyń qozǵalysyn josparlaý jáne monıtorıngteý quraldaryn, sondaı-aq qaldyqtardy basqarý ınfraqurylymy nysandarynyń biryńǵaı derekqoryn biriktirý josparlanyp otyr.
Sonymen qatar qaldyqtar naryǵyn qalyptastyrý jumystary júrgizilip jatyr. Qaldyqtarmen elektrondyq saýda jasaý quraldaryn engizý jáne qaıta óńdeý salasynda jumys isteıtin bıznesti ekonomıkalyq yntalandyrý tetikterin damytý kózdelgen.
Jumystyń taǵy bir baǵyty – aýyldyq jerlerdegi qatty turmystyq qaldyqtardy basqarý júıesin jetildirý. Qajetti ınfraqurylymdy damytýdy, sondaı-aq qaldyqtardy shyǵarýdy josparlaý men uıymdastyrýdyń zamanaýı tetikterin qamtıtyn QTQ-ny basqarýdyń tsıfrlyq modelin engizý josparlanyp otyr.
-Ónerkásiptik qaldyqtar salasynda qaıta óńdeýdi qoldaý quraldaryn engizý, otandyq jáne halyqaralyq ınvestıtsııalardy tartý, sondaı-aq qaldyqtar túziletin jerlerde qaıta óńdeý qýattaryn qurý kózdelgen,-delingen habarlamada.
Eske salaıyq, 2025 jylǵy 31 jeltoqsanda Qazaqstan Respýblıkasy Úkimetiniń qaýlysymen Qazaqstan Respýblıkasynda qaldyqtardyń barlyq túrlerin basqarýdyń 2026–2030 jyldarǵa arnalǵan tujyrymdamasy bekitildi. Qujatta alǵash ret qaldyqtardyń ártúrli túrlerin basqarýdyń júıeli tásilderi aıqyndalyp, aınalmaly ekonomıka qaǵıdattaryna kóshýge negiz qalandy.
Tujyrymdamanyń negizgi mindeti – qaldyqtardy tek kádege jaratý nysany retinde emes, ekonomıkalyq aınalymǵa qaıta tartýǵa bolatyn resýrs retinde qarastyratyn keshendi ári ekonomıkalyq turǵydan negizdelgen júıe qalyptastyrý.
Tujyrymdamada kózdelgen tásilderdi iske asyra otyryp, «Jasyl damý» AQ qaldyqtardy basqarýdyń jańa júıesiniń ınstıtýtsıonaldyq, tsıfrlyq jáne ekonomıkalyq negizin qalyptastyrýda. Júıeni damytý salanyń ashyqtyǵyn arttyrýǵa, qaıta óńdeý kólemin ulǵaıtýǵa jáne qaldyqtardy ekonomıkalyq aınalymǵa qaıta tartýǵa baǵyttalǵan.
Osyǵan deıin Qazaqstanda qaýipti qaldyqtardy zertteý men baqylaý kúsheıetini týraly jazdyq.
