Qazaqstan qaldyqtardy basqarý baǵytynda 99-orynda tur — Edil Jańbyrshın
ASTANA. KAZINFORM — Májilis depýtaty Edil Jańbyrshın Májilistiń jalpy otyrysynda ekologııalyq máseleler jónindegi zań jobasyn birinshi oqylymda tanystyryp, elimizdegi ekologııalyq ahýaldy jaqsartý úshin zańnamany jetildirý qajettigin málimdedi.
Depýtattyń aıtýynsha, ekologııa máselesi búginde tek mamandandyrylǵan sala emes, azamattardyń ómir sapasyna, halyq densaýlyǵyna, ınvestıtsııalyq tartymdylyq pen ulttyq qaýipsizdikke tikeleı áser etetin strategııalyq baǵytqa aınalǵan.
— Qazaqstanda sheshimin tolyq tappaǵan kúrdeli ekologııalyq problemalar bar. Ýákiletti organnyń málimetine sáıkes, elimizde jyl saıyn atmosferaǵa shamamen 4 mıllıon tonna lastaýshy zat shyǵarylady. Qatty turmystyq qaldyqtardyń jyldyq kólemi 5 mıllıon tonnany quraıdy. Ekologııalyq turǵydan problemaly nysandar sany — 1580. Al 2700-den astam polıgonnyń tek 20 paıyzy ǵana sanıtarlyq talaptarǵa sáıkes keledi, — dedi Edil Jańbyrshın.
Sondaı-aq ol EPI-2024 Ekologııalyq tıimdilik ındeksi boıynsha Qazaqstan qaldyqtardy basqarý baǵytynda 180 eldiń ishinde 99-orynda turǵanyn atap ótti.
Depýtat Memleket basshysy Qasym-Jomart Toqaev el aldyna 2060 jylǵa qaraı kómirtegi beıtaraptyǵyna qol jetkizý, ekologııalyq turaqty damýdy qamtamasyz etý, orman alqaptaryn ulǵaıtý jáne eldi mekenderdi kógaldandyrý mindetterin qoıǵanyn eske saldy.
— Bul — jaı ǵana ekologııalyq uran emes. Bul — Qazaqstannyń jańa ekonomıkalyq damý modeliniń negizi. Alaıda mundaı mindetterdi iske asyrý úshin zamanaýı, naqty ári tıimdi jumys isteıtin zańnamalyq baza qajet, — dedi depýtat.
Osyǵan baılanysty zań jobasy depýtattardyń bastamasymen ázirlengen. Qujat ekologııalyq zańnamany jetildirýge, retteýdegi júıeli olqylyqtardy joıýǵa, tsıfrlyq sheshimderdi engizýge, sondaı-aq ekologııalyq baqylaý men qaldyqtardy basqarýdyń tıimdi tetikterin qalyptastyrýǵa baǵyttalǵan.
Buǵan deıin Qazaqstan UOK Eco Athlete jobasy aıasynda úshinshi ekologııalyq aktsııasyn ótkizetinin jazǵanbyz.
