Qazaqstan qalalarynda Ózbekstannyń dıplomatııalyq ókildikteri ashylýy múmkin
ASTANA. QazAqparat - Qazaqstannyń birqatar qalalarynda Ózbekstannyń dıplomatııalyq ókildikteri ashylýy múmkin. Bul týraly búgin Májilistegi Úkimet saǵatynda QR Syrtqy ister mınıstriniń birinshi orynbasary Muhtar Tileýberdi aıtty, dep habarlaıdy QazAqparat.
«Qosymsha konsýldyq beket ashý nemese elshilik ornalastyrý - bul osy jerde atalǵan dıplomatııalyq mekemeleri bar memlekettiń erikti quqyǵy. Ózbekstannyń jańa basshylyǵy elshiligin Almatydan Astanaǵa kóshirý týraly sheshim qabyldady. Al Almatyda Bas konsýldyq jumys isteıtin bolady», - dedi ol.
Onyń atap ótýinshe, qazirgi ýaqytta Ózbekstan syrtqy ister mınıstrligimen atalǵan eldiń Qazaqstandaǵy dıplomatııalyq ókildikterin odan ary keńeıtýge qatysty kelissózder júrgilip jatyr.
«Biz óz tarapymyzdan elshige jáne Bas konsýldyqqa mundaı akkredıtatsııaǵa ruqsat berdik. Іshki ister mınıstrliginiń usynysymen ózge qalalarda da dıplomatııalyq ókildikterdi keńeıtý múmkindigi týraly Ózbekstan syrtqy ister mınıstrligimen kelissózder júrgizip jatyrmyz», - dedi Muhtar Tileýberdi.
