Qazaqstan qalalaryna 500-deı jasandy tynys alý apparaty jetkizildi

NUR-SULTAN. QazAqparat - Búgingi tańda Qazaqstan qalalaryna 498 jasandy tynys alý apparaty jetkizildi, dep habarlaıdy QazAqparat tilshisi QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Onyń ishinde Nur-Sultan qalasyna 126, Almatyǵa 64, Shymkentke 156 apparat jetkizilip, qajettilik tolyq óteldi. Sondaı-aq, Aqmola oblysy 3, Almaty oblysy 32, Aqtóbe oblysyna 25, Qyzylorda oblysyna 53 jáne Pavlodar oblysyna 39 jasandy tynys alý apparatyn aldy. Taǵy da osyndaı 276 apparat Almaty, Aqtóbe, Pavlodar, Túrkistan jáne Qaraǵandy oblystaryna beriledi. 377 apparaty stendti synaqtardan ótip jatsa, 349-y jiberýge daıyn.

Jalpy bıylǵy 15 qazanǵa deıin elimizdiń barlyq óńirine 1,5 myńdaı jasandy tynys alý apparatyn jetkizý josparlanyp otyr. Qazaqstanda memlekettiń qatysýymen «Qazaqstan Aselsan ınjınırıng» JShS (Nur-Sultan qalasy) jáne «Tynys» AQ (Kókshetaý qalasy) kásiporyndary jasandy tynys alý apparatyn shyǵarady. Bul kásiporyndar - «Qazaqstan ınjınırıng» ulttyq kompanııasynyń enshiles uıymdary.

Koronavırýs pandemııasyna baılanysty elde qalyptasqan epıdemıologııalyq jaǵdaıǵa oraı jasandy tynys alý apparattary jetispeýshiligin eskerip, «Qazaqstan Aselsan ınjınırıng» JShS qysqa ýaqyt ishinde ókpeni jasandy jeldetetin statsıonarlyq apparattar óndirisin ıgerdi. Al «Tynys» AQ «Kókshetaý-4P» jasandy tynys alý 680 mobıldi apparatyn shyǵarady.

Medıtsına mamandarynyń pikirinshe, apparat qoldanýǵa yńǵaıly ári senimdi jáne elektr qýatyna táýeldi emes. Kásiporynnyń óndiristik qýaty aıyna 500 apparat shyǵarýǵa jetedi.

Odan bólek, «Tynys» AQ jasandy tynys alý portatıvti apparattaryn, «Kókshetaý 3» medıtsınalyq buıymdardyń túrli nomenklatýrasyn, onyń ishinde kóp rettik betperdelerdi, múgedekterge arnalǵan arbalardy jáne t. b. zattardy shyǵaryp jatyr.

«Bul kásiporyndardyń negizgi qyzmeti Qazaqstan Respýblıkasynyń jáne ózge de elderdiń Qarýly Kúshteriniń qajettilikteri úshin joǵary tehnologııalyq ónimder shyǵarýǵa baǵyttalǵan. Al jasandy tynys alý óndirisi medıtsınalyq mekemelerdiń qajettilikterin óteýge baǵyttalǵan memlekettik tapsyrys aıasynda jolǵa qoıyldy. Kásiporyndar qosymsha qajettilik týyndaǵan jaǵdaıda medıtsınalyq tehnıka men kez kelgen ónimdi qajet mólsherde óndirip, jetkize alady»,-delingen habarlamada.