Qazaqstan qalalary Olımpıada kúnin atap ótedi

NUR-SULTAN. QazAqparat - Erteń, ıaǵnı 23 maýsym jeksenbi kúni Qazaqstanda Halyqaralyq Olımpıada kúni atalyp ótedi, dep habarlaıdy QazAqparat.

QR Ulttyq olımpıadalyq komıteti habarlaǵandaı, Qazaqstan bul merekeni 26-shy ret atap ótkeli otyr. Bul kúni elimizdiń qalalarynda buqaralyq-sporttyq is-sharalar ótedi.

Nur-Sultan qalasynda merekelik baǵdarlama 09:00-de bastalady. Negizgi baǵdarlama Ortalyq mádenıet jáne demalys baǵynda uıymdastyrylmaq.

Merekelik baǵdarlama aıasynda jetinshi dan ıegeri, jekpe-jek óneriniń sheberi Onısı Nobýkadzýdyń sheberlik sabaǵy ótedi. Sondaı-aq, Fitness Park Astana komandasynyń nusqaýshylary jalpyǵa arnalǵan jeńil dene shynyqtyrý saǵatyn josparlap otyr. Olımpıada kúnindegi baǵdarlamalar tizbegi boks, djıý-djıtsý, zýmba, ıoga, kross-fıtten ótetin sheberlik saǵattarymen jalǵasyn tabady.

Al Almaty qalasynda bul kúni arnaıy velojarys uıymdastyrylmaq. Jarys tańǵy saǵat 9:00-de Toraıǵyrov jáne Saıyn kósheleriniń qıylysynda bastaý alady. Qatysýshylar arnaıy velojolaqta jarysyp, Ortalyq stadıon mańynda jeńimpaz anyqtalady.

Aıta ketelik, Halyqaralyq Olımpıada komıteti 1948 jyly Sankt-Morıtsede ótken HOK-tyń 42-shi sessııasynda 23 maýsymda Halyqaralyq Olımpıada kúnin ótkizý týraly sheshim qabyldady. Bul kúnniń tańdalýy da beker emes. 1894 jyldyń 23 maýsymynda HOK qurylǵan bolatyn. Dál sol kúni olımpıadalyq qozǵalystyń negizin salýshy, baron Per de Kýberten halyqaralyq atletıkalyq kongress aldynda tarıhı baıandama jasaǵan.

Merekeni toılaý barysynda Qazaqstan qalalarynda jyl saıyn sporttyq-buqaralyq is-sharalar uıymdastyrylady.