Qazaqstan qalalaryndaǵy jylytqyshtyń baǵasy qansha

ASTANA. KAZINFORM - Kún sýytqan kezde úıdegi jylý batareıalary qosylyp tursa da, bólme ishinde qolaıly temperatýrany saqtaý árdaıym múmkin bola bermeıdi. Osyndaı jaǵdaıda qosymsha jylytqyshtar kómekke keledi. Naryqta olardyń túri de, tańdaýy da kóp. Qazaqstanda qandaı qurylǵylar satylymda bar jáne olardyń baǵasy qansha?

obogrevatel
Foto: Kazinform/II

Bul suraqqa Kazinform tilshisi jaýap izdep kórdi.

Maıly radıatordan bastap konvektorǵa deıin

El naryǵynda qýaty, qurylymy jáne jumys isteý prıntsıpi ártúrli jylytqyshtar usynylǵan. Qurylǵyny tańdaý kezinde elektr symdarynyń jaı-kúıin, bólmeniń aýmaǵyn jáne jylytqyshty qansha ýaqyt paıdalanatynyńyzdy eskergen jón.

Eń kóp taralǵan qurylǵylardyń biri – maıly radıator. Onyń basty artyqshylyǵy – elektr qýatynan ajyratylǵannan keıin de jylýdy uzaq ýaqyt saqtaı alýy. Mundaı qurylǵylar dybyssyz jumys isteıdi jáne bólmeni uzaq ýaqyt jylytýǵa qolaıly.

Taǵy bir keń taralǵan túri – jylý jeldetkishi. Aýany aınaldyrý arqyly bólmeni jyldam jylytady. Mundaı qurylǵylar shaǵyn, alyp júrýge yńǵaıly ári jylytqyshtardyń basqa túrlerine qaraǵanda arzanyraq bolady. Degenmen olardy ádette qysqa merzimdi jylytý úshin paıdalanady. Sebebi qurylǵyny óshirgennen keıin bólme aýasy birtindep salqyndaıdy.

Satylymda elektr konvektorlary da bar. Olar ózinen ótetin aýany qyzdyrady jáne dybyssyz jumys isteıdi. Alaıda qurylǵyny óshirgennen keıin bólme temperatýrasy salystyrmaly túrde tez tómendeýi múmkin.

Infraqyzyl jylytqyshtar da bar. Olar jylýdy tikeleı adamǵa baǵyttaıdy. Sondyqtan jylý áseri birden seziledi. Mundaı qurylǵylar belgili bir aýmaqty jylytýǵa qolaıly.

Baǵalardy salystyrý úshin Kazinform tilshileri jylytqyshtardyń eki túrin tańdady. Olar – baǵasy qoljetimdi qurylǵylardyń biri sanalatyn jylý jeldetkishteri jáne keńinen taralǵan maıly radıatorlar.

2 myńnan 15 myń teńgege deıin: jylý jeldetkishin tańdaımyz

Qazaqstanda jylý jeldetkishteriniń ortasha baǵasy 6-7 myń teńge shamasynda. Quny qalaǵa, saýda ornyna jáne qurylǵynyń tehnıkalyq sıpattamalaryna baılanysty qubylady. Dúkenderden Qytaıda shyǵarylǵan salystyrmaly túrde arzan úlgilerdi de kezdestirýge bolady.

Eń tómen baǵa Qostanaı qalasynda tirkelgen. Munda jylý jeldetkishterin 2 myń teńgeden bastap satyp alýǵa bolady. Tarazda olardyń baǵasy 3 myńnan 10 myń teńgege deıin jetse, Semeıde eń tómengi quny – 3 800 teńge.

Oral men Túrkistanda baǵa 4 myń teńgeden bastalady. Óskemende jylý jeldetkishterin 4 500 teńgeden satyp alýǵa bolady. Al Petropavlda olardyń quny 4 800 teńgeden 10 myń teńgege deıin barady.

Almaty men Shymkentte jylý jeldetkishteriniń baǵasy 5 500-15 myń teńge aralyǵynda.

Aqtóbe, Qaraǵandy, Pavlodar, Qyzylorda, Aqtaý jáne Astana qalalarynda mundaı qurylǵylardyń eń tómengi baǵasy – 6 myń teńge.

Kókshetaýda jylý jeldetkishteri 6 300-9 800 teńge aralyǵynda satylyp jatyr. Jezqazǵan men Taldyqorǵanda baǵasy 6 500 teńgeden bastalady. Al Atyraýda mundaı qurylǵylardy 7-10 myń teńgege satyp alýǵa bolady.

Tómende ár qaladaǵy jylý jeldetkishteriniń baǵasy ınfografıka túrinde usynylǵan.

Maıly radıator tańdaımyz: qalalar boıynsha baǵalarǵa sholý

jylytqysh
Foto: Kazinform

Maıly radıatorlardyń baǵasy jylý jeldetkishterine qaraǵanda edáýir qymbat. Degenmen tómen baǵa árdaıym tıimdi satyp alý degendi bildirmeıdi. Arzan úlgiler shaǵyn bólmelerdi jylytýǵa ǵana arnalǵan bolýy múmkin. Sondyqtan qurylǵyny tańdaǵanda onyń qunyna ǵana emes, qýatyna da nazar aýdarǵan jón.

Eń qoljetimdileri Qostanaı qalasynda tirkelgen. Munda maıly radıatorlardyń baǵasy 8 myńnan 25 myń teńgege deıin qubylady. Aqtaýda olardyń quny 10 myń teńgeden bastalyp, 30 myń teńgege deıin jetedi. Shymkentte eń tómengi baǵa – 12 myń teńge. Al Oral, Taraz jáne Túrkistan qalalarynda maıly radıatorlardy 14 myń teńgeden bastap satyp alýǵa bolady.

Jezqazǵanda maıly radıatorlardyń baǵasy 14 500 teńgeden 45 myń teńgege deıin ózgeredi. Astana, Semeı, Qaraǵandy, Qyzylorda jáne Petropavl qalalarynda osyndaı qurylǵylardyń quny 15 myń teńgeden bastalady.

Pavlodar men Almatyda eń tómengi baǵa – 16 myń teńge. Taldyqorǵan men Atyraýda maıly radıatorlardy 18 myń teńgeden bastap satyp alýǵa bolady.

Bastapqy baǵasy eń joǵary qalalardyń biri – Óskemen. Munda maıly radıatorlar 19 500-40 myń teńge aralyǵynda satylyp jatyr. Al Aqtóbe men Kókshetaýda mundaı jylytqyshtardyń baǵasy 20 myń teńgeden bastalady.

Qandaı qaýipsizdik erejelerin saqtaý qajet?

Jylytqyshty tańdaǵanda onyń baǵasy men tıimdiligine ǵana emes, paıdalaný qaýipsizdigine de mán bergen jón. Elektr qurylǵylaryn durys paıdalanbaý kúıik shalýǵa, tok soǵýǵa, tipti órt shyǵýyna sebep bolýy múmkin.

Eń úlken qaýiptiń biri – órt. Sondyqtan jylytqyshtardy perde, jıhaz, tósek-oryn jáne tez tutanatyn basqa da zattardyń janyna qoıýǵa bolmaıdy.

Balalardyń qaýipsizdigin de esten shyǵarmaǵan jón. Keıbir jylytqyshtardyń syrtqy beti jumys kezinde qatty qyzady. Sol sebepti qurylǵylardy kishkentaı balalardyń qoly jetpeıtin jerge ornalastyrý qajet.

Elektr symdary men rozetkalardyń jaǵdaıyna da erekshe nazar aýdarý kerek. Qýaty joǵary jylytqyshtar elektr jelisine qosymsha salmaq túsiredi. Jelige shamadan tys kúsh túsken jaǵdaıda rozetkalar qyzyp, balqýy múmkin. Sondaı-aq avtomatty qorǵanys ajyratqyshtary iske qosylýy yqtımal.

Mamandar jumys istep turǵan jylytqyshtardy qaraýsyz qaldyrmaýǵa jáne uıyqtar aldynda mindetti túrde óshirýge keńes beredi. Osy qarapaıym qaýipsizdik talaptaryn saqtaý órt pen basqa da oqys jaǵdaılardyń aldyn alýǵa kómektesedi.

Eske salsaq, osyǵan deıin Qazaqstandaǵy eń arzan jáne qymbat qazy qaıda satylatyndyǵy jaıly jazǵanbyz.