Qazaqstan qalalaryndaǵy jeke mektepterde oqý aqysy qansha
Jańa oqý jylynda oqý aqysy aımaqqa, oqý baǵdarlamasynyń deńgeıine jáne jasalatyn jaǵdaıǵa baılanysty ózgerip otyr. Kazinform agenttiginiń tilshisi baǵany baǵamdady.
Oqý aqysy 30-35 myń teńgeden bastalyp, aı saıynǵa tólem halyqaralyq bilim ordalarynda 1,5 teńgege deıin jetken. Almaty, Astana, Shymkent, Aqtóbe men Atyraýda tańdaý kóp. Keıbir óńirde jeke mektepter endi-endi ǵana ashylyp, qabyldaý bastaldy.
Petropavlda jeke mektepte oqý aı saıyn 120 myń teńge bolyp tur. Sıngapýrlyq ádispen oqytady jáne oqý orny tamaqtandyrady.
Qostanaıda jeke mektepte oqý aqysy 65-120 myń teńge aralyǵynda. Mekteptiń kóbi til oqytýǵa jáne bıznes álippesin meńgerýge kúsh salady.
Pavlodarda birneshe jeke mektep bar. Aı saıynǵy tólem 100 myń teńgeden bastalyp, 170 myń teńgege (keıbir jeke mektepter jyldyq oqý aqysyn tólese aı saıyn 90 myń teńgeden eseptep beredi) deıin jetti.
Kókshetaýda aı saıynǵa tólem — 170 myń teńge. Oǵan tamaqtaný, úı tapsyrmasyn oqý ornynda oryndaý qyzmeti kiredi.
Aqtóbede jeke mektepte oqý quny orta eseppen 85-90 myń teńge aralyǵynda. Ózge de tańdaý bar. Máselen birinshi synypqa baratyn balany sıngapýrlyq ádispen oqytqyńyz kelse aı saıyn 125 myń teńge tóleýge týra keledi. Oqý baǵdarlamasy memlekettik standartqa saı jáne úı tapsyrmasyn oryndaýǵa, aǵylshyn, matematıka pánderin tereńdete oqytyp, tuz shahtasyn qoldanýǵa, serýendeýge múmkindik beredi. Al joǵarıa synyp oqýshylaryna 200 myń teńge suraıdy.
Oralda jeke mektepte oqý baǵasy aıyna 50 myń teńgeden bastalady. Sonymen birge 150-170 myń teńge tólep pánderdi tereń meńgerýge bolady. Úı tapsyrmasyn da mektepte muǵalimmen birge oryndaıdy.
Aqtaýda jeke mektepterdegi oqý quny aıyna 70-280 myń teńge aralyǵynda. Atyraýda baǵa sál joǵary. Jeke mektepte oqý quny 100-250 myń teńge bolsa, halyqaralyq mektepterde aqysy 800 myńnan bastalyp 1,2 mln teńgege deıin jetedi. Keıbir mektepte arnaıy oqý granttary qarastyrylǵan.
Óskemende iri eki jeke mektep bar. Orta eseppen aı saıynǵa tólem — 280 myń teńge. Al Semeı turǵyndary jeke mektepke 40-110 myń teńge tóleıdi. Orta eseppen aıyna 60-70 myń teńgege shyǵyp tur. Keıde tamaqtaný men túrli úıirmeler qosylady, oǵan arnaıy tólem (15-20 myń teńge) tóleýge týra keledi.
Qaraǵandylyqtar 80-150 myń teńgeniń jeke mektepterin tańdaı alady. Orta eseppen baǵa — 120 myń teńge. Al Jezqazǵanda ortasha baǵa — 100 myń teńge.
Qyzylordada ata-analar balasynyń oqýyna aı saıyn shamamen 15-50 myń teńge tóleıdi.
Tarazda taıaýda ǵana ashylǵan mektep 1-4 synyp oqýshylaryna arnalǵan oqý aqysyn 57 myń teńge dep bekitti. Al ortanshy jáne joǵary synyp oqýshylary úshin 60 myń teńge. Ortasha baǵa — 35-60 myń teńge.
Qonaevta bastaýysh synyp oqýshylary memlekettik tapsyrys aıasynda bilim alady. Al 5-11 synyp oqýshylary úshin aı saıynǵy tólem 30 myń teńgeden bastalady. Tildi tereń meńgerý jáne túrli úıirmelerge qatysý úshin qosymsha aqy tóleý kerek. AlTaldyqorǵanda bastaýysh synypta (1-4 synyp) oqý — 85 myń teńge. Bala kúni boıy mektepte júredi jáne sonda tamaqtanady. Al joǵary synyp oqýshylaryna 98 myń teńge tóleıdi. Oǵan tamaqtaný da, UBT-ǵa daıyndaý da kirmeıdi.
Túrkistanda jeke mektepte oqý quny aıyna 50-150 myń teńge aralyǵynda.
Shymkentte jeke mektep kóp, tańdaý mol. Oqý aqysy 35 myń teńgeden (memlekettik baǵdarlamamen oqytady, tamaqtaný men úıirmege qosymsha aqy tóleıdi) bastalady. Sonymen birge 70-170 myń teńge tólep tildi tereń meńgerýge, ǵylymmen aınalysýǵa, tamaqtanýǵa múmkindik bar. Halyqaralyq mektepterdiń oqý aqysy aıyna — 245–260 myń teńge.
Sonymen birge Astanada da tańdaý mol. Munda aı saıynǵy oqý aqysy 97 500 teńgeden bastalyp, 1,4-1,5 mln teńgege (halyqaralyq deńgeıdegi mektep) deıin jetedi. Elordadaǵy qoljetimdi jeke mektepte oqý aqysy 150-200 myń teńge, ortashasy 300-400 myń teńge, al premıým nusqasy 800 mtsń teńgeden bastalady.
Almatyda jeke mektepterdiń oqý aqysy — 125 myń teńgeden bastalyp, 1,4 mln teńgege deıin jetti. Tarqatyp qarasaq, qaltaǵa qonymdysynda oqý aqysy aıyna 350 myń teńge bolsa, ortashasy 350-600 myń teńge, al premıým nusqasy 800 myń teńgeden bastalady.
QR Oqý-aǵartý mınıstrliginiń aqparatyna súıensek, jeke mektepterde oqý (oǵan memlekettik tapsyrysqa qatysatyn halyqaralyq mektepter de kiredi) soltústik óńirlerde orta eseppen 1,2 mln teńge, ońtústik óńirlerde 491 myń teńge. Shyǵysta orta eseppen 903 myń teńge bolsa, elimizdiń batysynda jylyna 1 mln teńge jumsaıdy. Al elimizdiń ortalyǵyndaǵy baǵa 960 myń teńge.
Megapolısterde, máselen Shymkentte jyl saıynǵy tólem orta eseppen 871 myń teńge. Almaty men Astanada — 1,9 jáne 2,3 mln teńge. Mınıstrliktiń habarlaýynsha, baǵanyń joǵary ekenine qaramastan jyl ótken saıyn megapolısterde jeke mektepterge degen suranys artyp keledi.
Aıtyp óteıik, ótken oqý jylynda memlekettik tapsyrys aıasynda jeke mektepterge 185 mlrd teńge bólindi.
Kazinform buǵan deıin oqý kýrstarynyń qunyn jazdy.