Qazaqstan qalalaryndaǵy avtobýs jolaqysynyń quny qansha

Elimizde qoǵamdyq kólik jolaqysy turaqty. Qazirgi kezde ózge óńirlerge qaraǵanda Túrkistan, Shymkent pen Aqtaý qalalarynda baǵa tómen dep habarlaıdy Kazinform agenttiginiń tilshisi.

Qoǵamdyq kólik jolaqysynyń tarıfin jergilikti ákimdik bekitedi. Tasymaldaýshy kásiporyn shyǵynynyń bir bóligi sýbsıdııalanyp, qoldaý kórsetilip otyrady. Sondyqtan keıbir óńirde jergilikti ákimdik birqatar jeńildik jasap, tegin júretin sanattar qataryn anyqtaıdy.

Elimiz boıynsha Túrkistan, Aqtaý men Shymkent qalalarynda karta jáne onlaın tólese, bir adamǵa – 70 teńge. Túrkistanda jolaqyny qolma-qol tólese – 100 teńge, Aqtaýda – 150 teńge. Bul qalalarynda oqýshylar jolaqynyń teń jartysyn ǵana tóleıdi. 

Shymkent qalasynda tarıf 2016 jyldan beri kóterilmedi. Qazirgi kezde jolaqyny 120 teńgege ósirý úshin talqylaý júrip jatyr. Jergilikti ákimdik tarıf kóterilse de jeńildik qoldanyp júrgen jolaýshylar sanatyn saqtap qalmaq nıette. 

Taldyqorǵan, Semeı, Jezqazǵan, Atyraý men Aqtaýda jolaqy tarıfi sál joǵary. Onlaın tólese – 80 teńge. Al qolma-qol tólese Taldyqorǵanda – 120 teńge, Aqtóbede – 150 teńge, Semeı qalasynda – 140 teńge. Oqýshylar karta arqyly jolaqysynyń teń jartysyn tólese, qolma-qol jáne onlaın 80 teńge beredi. 

Aqtóbede jeńildik sanatyna jatatyn jolaýshylar tegin júredi, al Atyraýda jolaqysynyń 50%-yn tóleıdi. Bir artyqshylyǵy munda mektep oqýshylaryna sabaq bastalǵanda olardyń tegin júrýine múmkindik jasalǵan. Al stýdentter marshrýtta kúnine eki ret tegin qatynaıdy. ıAǵnı sabaqqa tegin baryp-kelýine bolady. 

Jezqazǵanda kópbalaly otbasy balalary qoǵamdyq kólikte tegin júredi. Qyzylordada jolaýshylar tasymaldaýshy kompanııanyń sýbsıdııa alatyn marshrýtyna eresekter 85 teńge, balalar 40 teńge tóleıdi. Al jeke marshrýttarda jolaqy – 100 teńge.

Óskemende kartamen esep aıyryssa 90 teńge, qolma-qol 130 teńge dep bekitti. Al balalar qoǵamdyq kólikte tegin júredi. 

Infografıka: Kazinform

Elimiz boıynsha kóp qalada jolaqy – 100 teńge. Oral, Petropavl, Pavlodar, Qostanaı, Kókshetaý men Tarazdaǵy tarıf osy. 

Oralda qolma-qol tólese, bılet quny – 200 teńge. Oqýshylar men jeńildik sanatyna kiretin adamdar avtobýsta jolaqyǵa 50 teńge tóleıdi. 

Tarazda jolaqy tarıfi bıyl ózgerdi. Munda qolma-qol eresekterge 130 teńge, oqýshylarǵa 65 teńge. Al karta arqyly tólese – 50 teńge. 

Kókshetaýda oqýshylar jolaqysyna 40 teńge tóleıdi. Oqýshylarǵa qolma-qol – 70 teńge, eresekterge – 150 teńge. Zeınetkerler arnaıy kólik kartasyn qoldansa tegin júre alady. 

Qostanaıda tarıf sál joǵary. Eresekter qoǵamdyq kólikte qolma-qol esep aıyryssa 170 teńge tóleıdi. Al zeınetkerler 90 teńge, 7 jastan asqan balalarǵa – 50 teńge (qolma-qol eresekterge – 160 teńge, balalarǵa – 75 teńge). 7 jasqa tolmaǵan balalar men jeńildik sanatyna kiretin adamdar tegin qatynaıdy. 

Petropavlda eresekter 170 teńge, al balalar 85 teńge tóleıdi. Bul úshin júrgizýshige aqsha beredi, al júrgizýshi bılet rásimdeıdi. Balalar karta arqyly 50 teńge tóleýge mindetti.  

Pavlodarda eresekter qolma-qol 200 teńge tóleıdi. Qostanaılyq zeınetkerlerge jeńildik qarastyrylǵan. Munda oqýshylar qoǵamdyq kólikte tegin júrý quqyǵyna ıe. 

Astanada eresekter jolaqysyna 110 teńge tóleıdi. Jeńildik sanatyna kiretin jolaýshylar men 7 jasqa tolmaǵan balalar, sonymen birge mektep oqýshylary men kolledj bilim alýshylary tegin qatynaıdy. Oqýshylar men kolledj bilim alýshylary qoǵamdyq kólik kartasyn ózimen birge alyp júrýi tıis. Sonymen birge qalada aktsııa uıymdastyrylyp turady. Keıbir mereke kúnderi qoǵamdyq kólik tegin qyzmet kórsetedi. Jergilikti ákimdik aldyn ala habarlama taratady.

Elimiz boıynsha Almaty, Qaraǵandy men Qonaev qalalarynda jolaqy tarıfi joǵary. Karta arqyly – 120 teńge. 

Qaraǵandyda qolma-qol tólese 250 teńge tóleıdi. Bul qalada 18 jasqa deıingi balalar qoǵamdyq kólikte tegin júredi. 

Qonaevta qoǵamdyq kólik tarıfi bıyl qaıta bekitildi. Jolaýshy bıletke qolma-qol tólese jolaqy – 200 teńge. 

Almatyda oqýshylar, stýdentter men jeńildik sanatyna kiretin jolaýshylar 60 teńge tóleıdi. Qolma-qol tóleý nemese júrgizýshi esepshotyna aýdarý múlde qarastyrylmaǵan. Baqylaýshylar muny múlde qabyldamaıdy. Qala turǵyndarynyń kóbi aqsha únemdeý úshin arnaıy karta satyp alady. Eresekterge – 9 900 teńge, stýdentterge – 4 200 teńge, oqýshylarǵa – 2 000, zeınetkerlerge – 3 000 teńge. Kópbalaly otbasy balalary avtobýsta tegin júredi. 

Buǵan deıin UBT-ǵa daıyndyq kýrstarynyń baǵasy, TQS ortalyqtarynyń qyzmet quny men anar jáne qurma baǵasyn jazǵan edik.