Qazaqstan qalalarynda uıaly telefondy jóndeý qyzmetiniń baǵasy qansha
ASTANA. KAZINFORM — Smartfon birneshe jyl boıy qulap, kún saıyn qýattalyp júrse de, qalypty jumys isteı berýi múmkin. Alaıda ýaqyt óte kele birden birneshe qymbat bólshegin jóndeýge týra keletin jaǵdaılar da kezdesedi. Qurylǵyny qaıta qalpyna keltirýge qansha qarajat qajet ekenin Kazinform tilshisi anyqtap kórdi.
Shalt qımyldap, uıaly telefondy abaısyzda qoldan túsirip alsa, áınegi shytynap qalady. Al jóndeýge aparǵan kezde qorǵanysh áınegi emes, dıspleı modýliniń synǵany belgili bolady. Uıaly telefonnyń ózge de bólshegi jyldar óte kele eskiredi. Birneshe jyldan keıin qýattaǵyshy álsirep, qýattaý uıashyǵy durys jumys istemeı, ábigerge salady. Kún saıyn qoldanǵan soń uıashyq keńeıip, qozǵalyp, ishi shańǵa tolýy da múmkin.
Ekran, batareıa jáne qýattaý uıashyǵy — uıaly telefonnyń kedergisiz jumys isteýine múmkindik beretin negizgi elementter. Biz oǵan áınek pen qabyn qosamyz. Bul ekeýi telefonnyń qorǵanysh quraly sanalady. Beseýiniń baǵasyn bilip, Qazaqstanda uıaly telefondy jóndeýge qansha qarjy qajet ekenin eseptedik.
Eń joǵary baǵa Almatyda eken. Munda ekran aýystyrý quny 15 000 — 220 000 teńge aralyǵynda, al keıbir modelder úshin 340 000 teńgege deıin jetedi. Akkýmýlıator aýystyrýǵa 5 000 — 80 000, qýattaý uıashyǵyn jańartýǵa 4 000 — 70 000, áınekke 1 000 — 8 000 teńge tóleıdi. Telefon qabynyń quny 15 000 teńgege deıin barady. Eger sheber uıaly telefonyńyzdy qarap, qandaı jóndeý jumystary qajet ekenin aıtyp berse 5 000 teńge suraıdy, birden jóndeýge kelisseńiz keńes berý tegin. Jóndeý qyzmetiniń ortasha aqysy — 196 000 teńge.
Astanada dıspleıdi 15 000 — 180 000 teńgege, batareıany 8 000 — 50 000 teńgege aýystyryp beredi. Al telefon uıashyǵyn aýystyrý aqysy 4 000 — 40 000 teńge aralyǵynda. Áınek pen telefon qabynyń baǵasy Almatymen shamalas. Elordada 24/7 qyzmet kórsete beretin sheberler de bar. Olar mekenjaıǵa baryp-aq jóndeýge ázir. Jóndeý júrgizgen sheber tegin dıagnostıka jasap, bir jyldyq kepildik beredi. Bes qyzmettiń baǵasy 160 000 teńgeden sál joǵary.
Shymkent qalasynda dıspleıdi 15 000 — 150 000 teńgege aýystyryp beredi. Baǵaly uıaly telefondardyń ekranyn aýystyrý qyzmeti 50 000 teńgeden bastalady. Akkýmýlıator baǵasy 8 000 — 70 000 teńge, qýattaý uıashyǵy 10 000 — 50 000 teńge, áınek 1 500 — 7 000 teńge, qaby 1 500 — 6 000 teńge aralyǵynda. Qosalqy bólshek arzanǵa tússe, onyń túpnusqa bolmaǵany. Al aýystyrý jumysynyń quny sol kúıi saqtalady. Barlyǵyn aýystyrýǵa shamamen 160 000 teńge kerek.
Atyraý men Aqtaý qalalarynda qyzmet quny shamalas. Eki qalada telefondy tolyq jóndeýden ótkizý úshin 121 500 jáne 113 000 teńge qajet. Aqtaý qalasynda uıaly telefondardyń sońǵy nusqalaryn jóndeý baǵasy tómen, al eski modeldiń qosalqy bólshekterin aýystyrý qyzmetiniń quny joǵary. Akkýmýlıator men qýattaý uıashyǵynyń baǵasy eki qalada da 5 000 — 40 000 teńge aralyǵynda. Al ony aýystyrýǵa 3 000 teńge tóleıdi. Ekranyna áınek jabystyrýǵa 1 000 — 8 000, qabyn aýystyrýǵa 1 000 — 15 000 teńge qajet.
Aqtóbe, Taraz, Qonaev qalalary baǵasy ortasha óńirler qataryna kirdi. Munda telefondy jóndeýge orta eseppen 100 000 teńge jetkilikti. Aqtóbe qalasynda dıspleı aýystyrýǵa 50 000 — 60 000, batareıaǵa 20 000 — 50 000 teńge tóleıdi. Alaıda keıbir qosalqy bólshekti 2-3 apta kútýge týra keledi. Taraz qalasynda ekran aýystyrý baǵasy óndirýshige qaraı úsh esege deıin ózgerýi múmkin. Al Qonaev qalasynda shamamen 10 000 — 100 000 teńge aralyǵynda. Aqtóbe qalasynda telefon qaby arzan, Tarazda batareıa aýystyrý tıimdi.
Túrkistan qalasynda telefonnyń ekranyn orta eseppen 75 000 teńgege aýystyryp beredi. Qazir munda Android qurylǵylaryn jóndeý baǵasy iOS-qa qaraǵanda tómen. Batareıa aýystyrý qyzmetiniń quny elimiz boıynsha eń tómen. Baǵasy 5 000 — 15 000 teńge aralyǵynda. Sonymen birge áınek jabystyrý, telefonnyń qabyn aýystyrý arzanǵa túsedi.
Pavlodar qalasynda ekrandy orta eseppen 46 000 teńgege, akkýmýlıatordy 35 000 teńgege aýystyrady. Bir eskererlik jaıt, ekrannyń arzan jáne túpnusqa nusqasynyń arasyndaǵy aıyrmashylyq on ese bolýy da múmkin. Qýattaý uıashyǵyn aýystyrýǵa 4 000 — 35 000 teńge qajet. Baǵa uıaly telefon markasyna qaraı ózgerip otyrady.
Óskemen, Kókshetaý, Petropavl qalalaryda da baǵa bir-birine shamalas. Ekrannyń sapasy tómen kóshirme nusqasy shamamen 30 000 teńge, al sapaly kóshirmesi 50 000 teńge bolsa, túpnusqaǵa aýystyrý qyzmetiniń quny — 70 000 teńge. Aıta keteıik, OLED ekranynyń baǵasy 120 000 teńgege deıin barady. Al batareıa men qýattaý uıashyǵyn aýystyrý quny tómen.
Qyzylorda, Qaraǵandy men Taldyqorǵan qalalarynda telefon jóndeý qyzmetiniń ortasha baǵasy 84 000 — 88 000 teńge aralyǵynda. Munda ekrandy 8 000 — 80 000 teńgege, qýattaý uıashyǵyn 4 000 — 30 000 teńgege aýystyrýǵa bolady. Qyzylorda qalasynda ekrandy aýystyrý baǵasy 20% tómen, al akkýmýlıatordy jańalaý quny qymbattaý. Sonymen birge jergilikti sheberler olardy aýystyrmaý, 2 000-4 000 teńgege qýattaý uıashyǵyn tazartý tıimdi ekenin aıtady. Taldyqorǵanda telefon qaby arzan, al túpnusqasynyń baǵasy 20 000 teńgege jetedi.
Oral men Qostanaı qalalarynda telefondy tolyq jóndeýge shamamen 80 000 teńge qajet. Eger modýli zaqymdanbasa ekranyn 15 000 — 40 000 teńgege aýystyrady. Uıaly telefonnyń sońǵy nusqasyn jóndegende baǵasy 70 000-80 000 teńgege deıin ósedi. Akkýmýlıatordy aýystyrýǵa 25 000 teńge qajet. Sonymen birge bul qalalarda telefon qabyn aýystyrý arzanǵa túsedi.
Elimiz boıynsha baǵa Jezqazǵan men Semeı qalalarynda tómen. Uıaly telefonda tolyq jóndeýden ótkizýge orta eseppen 66 000 — 68 000 teńge jetkilikti. Ekrandy aýystyrýǵa 10 000 — 45 000 tóleıdi. Qymbat telefonnyń ekranyn aýystyrýǵa 60 000 teńge jumsaıdy. Batareıa men qýattaý uıashyǵyn aýystyrý baǵasy 20 000 — 25 000. Al eski telefondarnyń dál osy qosalqy bólshegin 5 000 — 15 000 teńgege aýystyrady. Dıagnostıka qyzmetiniń baǵasy — 3 000 — 5 000 teńge. Elimizdegi ortasha baǵa osy. Alaıda telefonda jóndeter bolsa, bul qyzmet bárinde tómen.
Buǵan deıin habarlaǵanymyzdaı, Qazaqstanda uıaly baılanystyń abonenttik qurylǵylaryn verıfıkatsııalaýǵa qatysty talaptar engizildi.
ІІM urlanǵan telefondardy satyp alǵany úshin jaýapkershilik bar ekenin eskertti.
